Sansar News
असार २९, काठमाडौं । सर्वोच्च अदालतको परमादेशबमोजिम राष्ट्रपति विद्यादेवी भण्डारीले कांग्रेस सभापति शेरबहादुर देउवालाई प्रधानमन्त्रीमा नियुक्त गरिसकेकी छिन् । उनले संविधानको धारा ७५ (५) बमोजिम प्रधानमन्त्रीमा नियुक्त गरेकी हुन् ।
नवनियुक्ती प्रधानमन्त्री देउवाको सपथग्रहण आज बेलुकी ६ बजेका लागि शीतल निवासमा तय भएको छ ।
तर, देउवा प्रधानमन्त्रीमा नियुक्त भएपनि निवर्तमान प्रधानमन्त्री केपी शर्मा ओलीले सरकारी निवास भने भोलीबाट मात्रै त्याग्ने भएका छन् । ओली निकट स्रोतले बताएअनुसार उनी बुधबार मात्रै बालकोट सर्ने तयारीमा रहेका हुन् ।
यता एमाले युवा संघले ओलीलाई विशेष स्कर्टिङ गर्दै उनको निजि निवासमा लैजाने तयारी गरेको छ । मंगलबार युथफोर्सलाई ब्यूँताएको घोषणा गरेको युवा संघले बुधबार दुई हजार गाडी र तीन हजार मोटरसाइकलले स्कर्टिङ गर्दै बालकोट पुर्याउने योजना बनाएको हो ।
युथफोर्स ब्यूँताउने घोषणा कार्यक्रममा युवा संघका इन्चार्ज महेश बस्नेतले स्कर्टिङ कार्यक्रमबारे जानकारी गराएका थिए ।
वि.सं.२०७८ असार २९ मंगलवार १४:३३ मा प्रकाशित
