हामी सबैकाे संसारन्यूज

१ साउन, काठमाडौं । नेकपा (एमाले)का अध्यक्ष एवं संसदीय दलका नेता केपी शर्मा ओलीले स्थायी कमिटी बैठक बोलाएका छन् । बैठक  बिहान ११ बजे तुलसीलाल प्रतिष्ठान ग्वार्कोमा  बोलाइएको हो ।

पुनःस्थापित प्रतिनिधि सभामा एमालेको भूमिकाबारे छलफल गर्न ओलीले आजको स्थायी कमिटीको बैठक बोलाएका हुन् ।

अध्यक्ष ओलीको निर्देशनमा महासचिव ईश्वर पोखरेलले स्थायी कमिटी बैठक बोलाएका हुन् । सरकारबाट बाहिरिएपछि पहिलो पटक एमालेको स्थायी कमिटी बैठक बस्न लागेको हो ।

माधव पक्षीय सांसदलाई पनि बैठकमा उपस्थितिको लागि निम्तो पठाइएकाे छ । तर, ओलीले बोलाएको संसदीय दलको बैठकमा जाने वा नजाने भन्ने विषयमा माधव पक्ष विभाजित देखिएको छ । माधव पक्षको मुख्य समूह बैठकमा नजाने निर्णयमा पुगेको छ भने अर्को समूह बैठकमा उपस्थित हुनुपर्ने निर्णयमा देखिएको छ ।

प्रतिनिधिसभा पुनःस्थापना भएर शेरबहादुर देउवा प्रधानमन्त्री भएपछि अध्यक्ष ओली र वरिष्ठ नेता माधवकुमार नेपालबीच अझ कटुता बढेको छ । आफ्ना समर्थकको लावालस्करका साथ बालुवाटारबाट निजी निवास खुमलटार पुगेका ओलीले माधव पक्षलाई गद्धारको संज्ञा दिँदै पार्टीको कुनै ठाउँ नभएको उद्घोष गरेका थिए ।

स्थायी कमिटी बैठकपछि तीन बजे नयाँ बानेश्वरस्थित लोत्से हलमा संसदीय दलको बैठक बोलाइएको छ ।