Sansar News
साउन ७, काठमाडौं । नेकपा (एमाले)का वरिष्ठ नेता माधवकुमार नेपालले छिट्टै नयाँ पार्टी खोल्ने संकेत गरेका छन् । बिहीबार पुष्पलालको ४३ औं स्मृति दिवसको अवसरमा काठमाडौं आयोजित एक कार्यक्रममा बोल्दै उनले यस्तो संकेत गरेका हुन् ।
उनले अब पनि अपमान सहेर बस्न नसकिने बताए । ‘आफैंले बनाएको घर त्यसै छाडेर जाने चाहना कसैको पनि हुन्न’, नेपालले भनेका छन्, ‘तर, अपमान सहेर, गलत कुरा सहेर बस्न सकिने अवस्था छैन्, अब सहेर बसिन्न ।’
कार्यक्रमलाई सम्बोधन गर्दै उनले कम्युनिष्ट पार्टी र त्यसका नेताको आचार, व्यवहार कम्युनिष्ट हुनुपर्ने बताए । उनले दासता सहेर बस्नेहरु कम्युनिष्ट हुन नसक्ने पनि उल्लेख गरे ।
कार्यक्रममा एमाले अध्यक्ष केपी शर्मा ओलीप्रति खनिएका नेपालले ओलीले निकै लाज लाग्ने व्यवहार गरेको बताए । ओलीमा कम्युनिष्ट चरित्र नरहेको उनको भनाई छ ।
‘बाँदर जुलुस भईरहेको छ, के हो बाँदर जुलुस ?’ नेता नेपालले भने, ‘यस्तो प्रवृत्ति कम्युनिष्ट हुनसक्छ ? के लोकतान्त्रिक चरित्र हो ? यस्ताबाट जनताले कार्यकर्ताले के आशा गर्ने ?’
वि.सं.२०७८ साउन ७ बिहीवार १२:२० मा प्रकाशित
