हामी सबैकाे संसारन्यूज

साउन १०, काठमाडौं । नेकपा (एमाले)का तेस्रो तहका नेताहरूले विघटित कार्यदलका संयोजकसँग छलफल गर्ने भएका छन्। दिउँसो एक बजे संसद् सचिवालय सिंहदरबारमा कार्यदल संयोजकद्वय भीम रावल र सुवासचन्द्र नेम्वाङसँग छलफल गर्न लागेको सांसद यज्ञराज सुनुवारले बताए ।

एमाले एकता जोगाउने अभियानअन्तर्गत छलफल गर्न लागेको उनले जानकारी दिए ।

एमालेमा दुवै पक्षबीचको विवाद हल गर्न सांसदहरुले दबाब समूह बनाएका छन् । दुवै पक्षमा देखिएका सांसदहरु सहभागी उक्त समूहले पार्टी विभाजन भए आफुँहरु कुनै पक्षमा पनि नलाग्ने बताईरहेका छन् । उनीहरुले एमाले एकताका लागि दबाब अभियान सञ्चालन गर्दै आएका छन् ।

आइतबार गर्न खोजिएको छलफल पनि सोही अभियानको निरन्तरता भएको सांसदहरुले बताएका छन् । एमालेमा तेस्रो धारको पहिचान बनाउन खोजिएको समूहमा दुवै तर्फबाट कृष्णप्रसाद दाहाल, डा। सूर्य पाठक, लालप्रसाद साँवा (एलपी), यज्ञराज सुनुवार, झपट रावल, जयकुमार राई, डा।दीपकप्रकाश भट्ट, नारायण खतिवडा, पवित्रा खरेललगायत छन् ।