हामी सबैकाे संसारन्यूज

साउन १९, काठमाडौं । प्रधानमन्त्री शेरबहादुर देउवाले कोभिड–१९ युनिफाइड केन्द्रीय अस्पतालका प्रमुख कार्यकारी अधिकारी डा. जागेश्वर गौतमसहित चार जनाको जिम्मेवारी हेरफेर गर्ने निर्णयलाई रोकिदिएका छन् । स्वास्थ्य राज्यमन्त्री स्तरीय निर्णयलाई उनले मौखिक निर्देशनका आधारमा रोकेका हुन् ।

देउवाले राज्यमन्त्रीले निर्णय गर्न नमिल्ने भन्दै कार्यान्वयनमा रोक लगाएका हुन्। स्वास्थ्य मन्त्रालयका एक उच्च अधिकारीले पनि प्रधानमन्त्री कार्यालयबाट निर्णय कार्यान्वयन नगर्न निर्देशन आएको पुष्टि गरे ।

विवादमा तानिएका डा. गौतमलाई स्वास्थ्य राज्यमन्त्री उमेश श्रेष्ठले सोमबार प्रसूति तथा स्त्रीरोग अस्पताल थापाथली सरुवा गरिदिएका थिए । उनले कोभिड युनिफाइड केन्द्रीय अस्पतालका प्रमुख कार्यकारी अधिकारीमा ट्रमा सेन्टरका डा. रुद्र मरासिनीलाई पठाएका थिए ।

यस्तै स्वास्थ्य समन्वय महाशाखामा डा. विवेकलाल कर्ण र सार्क क्षयरोग केन्द्रमा डा. रिता भण्डारीलाई पठाएका थिए ।