हामी सबैकाे संसारन्यूज

साउन ३०, काठमाडौं । नेकपा (माओवादी केन्द्र)को बैठकमा आगामी पुस दोस्रो साता राष्ट्रिय सम्मेलन गर्ने प्रस्ताव आएको छ । पार्टी अध्यक्ष पुष्पकमल दाहाल प्रचण्डले आगामी पुस ११ देखि १३ गतेसम्म राष्ट्रिय सम्मेलन गर्ने प्रस्ताव बैठकका राखेका हुन् ।

शनिबारदेखि सुरु पार्टीको केन्द्रीय कमिटीको बैठकमा राजनीतिक तथा संगठनात्मक प्रतिवेदन पेश गर्दै प्रचण्डले स्थानीय र प्रदेश स्तरका अधिवेशनहरु सकेपछि पुस ११ देखि राष्ट्रिय सम्मेलन गर्ने प्रस्ताव गरेका हुन् ।

प्रचण्डको प्रस्तावमा भदौ मसान्तभित्र पार्टी सदस्यता नवीकरण तथा वितरण अभियान चलाउने, असोज १० देखि सेल र टोल भेला गर्ने, २० गते वडा सम्मेलन, ३० गते पालिका सम्मेलन गर्ने र कात्तिक ३० गते जिल्ला सम्मेलन गर्ने उल्लेख छ ।

यस्तै मंसिर १५ गते प्रदेश सम्मेलन गर्ने प्रस्ताव प्रचण्डले गरेका छन् । बैठकमा प्रचण्डले विधान संशोधनको प्रस्ताव पनि पेश गरेका छन् ।

यस्ताे छ प्रचण्डले गरेकाे प्रस्ताव

• भदौ मसान्तसम्म सदस्यता नवीकरण र नयाँ सदस्यता वितरण ।
• असोज १० गते–देशैभर एकै दिन सेल र टोल भेला ।
• असोज २० गते वडा सम्मेलन ।
• असोज ३० गते गाउँपालिका र नगरपालिका सम्मेलन ।
• कात्तिक ३० गते जिल्ला सम्मेलन ।
• मङ्सिर १५ गते प्रदेश सम्मेलन ।
• पुस ११ देखि १३ सम्म राष्ट्रिय सम्मेलन ।