Sansar News
भदौ ७, काठमाडौं । माधवकुमार नेपाल समूहबाट अलग्गिएको नेकपा (एमाले)को तेस्रो पक्षका नेताहरु पार्टी अध्यक्ष केपी शर्मा ओलीलाई भेट्न बालकोट पुगेका छन् । १० बुँदे सहमति कार्यान्वयनका लागि सोमबारसम्मको अल्टिमेटम दिएका उनीहरु निर्णायक वार्ताका लागि बालकोट पुगेका हुन् ।
उनीहरुले ओली पक्षका नेताहरु सुवास नेम्वाङ र विष्णु पौडेललगायतसँग यसअघि बेग्लाबेग्लै छलफल गरेका थिए । अहिले ओलीसँग निर्णायक वार्ताको लागि भीम रावल, युवराज ज्ञवाली, सुरेन्द्र पाण्डे, गोकर्ण विष्ट, भीम आचार्य ,रघु पन्त लगायतका तेस्रो धारका नेताहरु पुगेका छन् ।
लामो समय माधव समूहमा रहेका उनीहरु पार्टी दर्ताको बेला छुट्टिएका थिए । उनीहरुले १० बुँदे सहमति कार्यान्वयन हुनुपर्ने र पार्टी विभाजन गर्न नहुने धारणा राखिरहेका छन् । नेताहरुले सहमति कार्यान्वयन नभए एमालेबाट अलग्गिने चेतावनी दिईरहेका छन् ।
तर, पार्टी अध्यक्ष ओली पक्षले भने १० बुँदे सहमति कार्यान्वयन भईसकेको बताएको छ । ओली पक्षले नेताहरुले माग गरे झैं माधव पक्षीय नेताहरुमाथि गरिएको कारबाही फिर्ताको सम्भावना नरहेको बताएको छ ।
वि.सं.२०७८ भदौ ७ सोमवार ११:५७ मा प्रकाशित
