Sansar News
१४ भदौ, काठमाडौँ । नेकपा एमाले कास्कीको समानान्तर समिति नेकपा (एकीकृत समाजवादी)मा समाहित हुने भएको छ।
नेकपा एमालेको विवाद चर्किरहेको बेला गत चैत्र १९ गते माधव नेपालले गठन गरेको समान्तर कमिटी नै नेकपा एकीकृत समाजवादी पार्टीमा रुपान्तरण हुने भएको हो ।
धनराज आचार्यको संयोजकत्वमा गठन गरिएको ७५ सदस्यीय समान्तर कमिटीलाई चैत २४ गते कमिटीलाई पूर्णता दिँदै १ सय ४७ सदस्यीय बनाइएको थियो । उक्त समिति मंगलबार नेकपा एकिकृत समाजवादीको कास्की जिल्ला समितिमा रुपान्तरण हुने भएको हो ।
अध्यक्षको जिम्मेवारीमा रहेका आचार्य कास्कीका स्थापित व्यवसायी हुन भने पृथ्वी नारायण क्याम्पसका पूर्व स्ववियु सभापति पनि हुन् ।
कमिटीको अध्यक्षमा धनराज आचार्य, सचिवमा होम नेपाली, सहसचिवमा पूर्ण लामा छन् । समानान्तर समितिका उपाध्यक्ष शोभाकर भण्डारीको कोभिड संक्रमणबाट मृत्यु भएको छ। उपाध्यक्ष पद खाली राखेर १ सय ८५ सदस्यीय एकीकृत समाजवादी पार्टी जिल्ला समिति घोषणा गरिन लागिएको अध्यक्ष आचार्यले जानकारी दिए ।
कास्की जिल्ला कमिटीसँगै पोखरा महानगर कमिटीमा पनि एमालेको समान्तर कमिटी नै एकीकृत समाजवादीमा रुपान्तरण हुने पनि अध्यक्ष आचार्यले बताए । १ सय ४१ सदस्यीय महानगर कमिटीको अध्यक्षमा मुक्ति पौडेल र सचिवमा सुशील बस्नेत छन् ।
कास्कीका एमाले केन्द्रीय सदस्य तथा पूर्वसांसद तुलबहादुर गुरुङ, चुडामणि विक जंगली, श्रीनाथ बराल, दिलु पन्त एकीकृत समाजवादी पार्टीको केन्द्रीय सदस्य छन् ।
वि.सं.२०७८ भदौ १४ सोमवार २२:४० मा प्रकाशित
