हामी सबैकाे संसारन्यूज

भदौ २३, काठमाडौं । नेकपा (एमाले)ले माधवकुमार नेपालसहित तत्कालिन पार्टी कारबाहीमा परेका १४ सांसदहरु उपस्थित भए संसद चल्न नदिने निर्णय गरेको छ । बुधबार नयाँ बानेश्वस्थित संसद भवनमा बसेको संसदीय दलको बैठकले यस्तो निर्णय गरेको हो ।

संसदीय दलको बैठकलाई सम्बोधन गर्दै दलका नेता केपी शर्मा ओलीले यथास्थितिमा सभामुखका रुपमा अग्निप्रसाद सापकोटालाई मान्न नसकिने बताए । एमाले फुटाउन सापकोटाले भूमिका खेलेको भन्दै उनले सभामुख मान्न नसकिने स्पष्ट पारे ।

‘जो एमाले सिध्याउन खोजिराख्या छ भने सभामुखको निष्पक्षता कसरी हुन्छ ? सभामुख गठबन्धनको पक्षधरमा देखिनुभयो, एमालेविरोधी षड्यन्त्रमा रहेको देखियो, तसर्थ सभामुखलाई यथास्थितिमा मानेर जान सक्ने स्थिति रहेन’, ओलीले भनेका छन् ।

यद्यपि १४ सांसदहरुमाथि गरिएको कारबाहीबारे स्पष्टीकरण सुनेर भने निष्कर्षमा पुग्ने उनले बताए । ओलीले माधवकुमार नेपालसहितका १४ सांसदलाई कुनै हालतमा स्वीकार गर्न नसकिने बताए ।

‘हामीले कारबाही गरेकाको लोगो किन खोस्दैनन् सभामुखले ?’, ओलीले भने, ‘यदि गैरसांसदको उपस्थिति छ भने कुनै पनि हालतमा सदन प्रारम्भै हुन दिँदैनौं ।’

उनले आफूहरुले निष्कासन गरेका व्यक्तिहरु पनि सदनमा आउने भए माओवादी केन्द्रले निस्कासन गरेका सांसदहरुलाई पनि ल्याएर सदन चलाउन माग गरे । ओलीले भने, ‘रामबहादुर थापा राष्ट्रिय सभामा हाजिर गर्नुपर्‍यो। प्रतिनिधि सभामा टोबहादुर रायमाझी हाजिर गर्नुपर्‍यो, लेखराज भट्ट, गौरीशंकर चौधरी, प्रभु साह उहाँहरुलाई पहिले हाजिर गर्नुपर्‍यो। उहाँहरु पहिले निष्कासित हुनुभएको थियो। उहाँहरुलाई हाजिर गरेर एउटा बैठक चलाऔँ, अर्को बैठकमा विचार गरौंला।’