हामी सबैकाे संसारन्यूज

भदौ २५, काठमाडौं । प्रधानमन्त्री शेरबहादुर देउवाले सत्ता गठबन्धनका नेताहरुसँग मन्त्रिपरिषद विस्तारका लागि सहयोग गर्न आग्रह गरेका छन् । शुक्रबार प्रधानमन्त्री निवास बालुवाटारमा बसेको गठबन्धनको बैठकमा देउवाले एक/दुई दिनभित्रै मन्त्रीहरुको नाम दिन भनेका थिए ।

बैठकमा सहभागी राष्ट्रिय जनमोर्चाकी उपाध्यक्ष दुर्गा पौडेलले जनाएअनुसार देउवाले अब मन्त्रिपरिषद विस्तारमा ढिलाई गर्न नहुने बताएका थिए ।

‘मन्त्रिपरिषद् विस्तारमा अब ढिलो गर्न नहुने कुरा प्रधानमन्त्री ज्यूले राख्नुभएको छ’, पौडेलले भनेकी छिन्, ‘उहाँले छिटोभन्दा छिटो मन्त्रिहरुको नाम दिन भन्नुभएको छ ।’

बैठकमा माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल, जनता समानवादी पार्टीका अध्यक्ष उपेन्द्र यादव र राष्ट्रिय जनमोर्चाकी दुर्गा पौडेलको उपस्थिति थियो ।

आजको बैठकमा मन्त्रिपरिषद विस्तार र एमसीसीकी उपाध्यक्ष फतिमा सुमारसँग भएको भेटवार्ताका विषयमा छलफल भएको पौडेलले जानकारी दिएकी छिन् ।