हामी सबैकाे संसारन्यूज

भदौ २८, काठमाडौं । नेकपाका अध्यक्ष नेत्रविक्रम चन्द ‘विप्लव’ले अमेरिकाले नेपालमा जबरजस्ती एमसीसी थोपर्न खोजेको भन्दै विरोध जनाएका छन् । सोमबार काठमाडौंमा आयोजित विरोध प्रदर्शनपछिको सभालाई सम्बोधन गर्दै विप्लवले राष्ट्रिय स्वतन्त्रतामा आँच आउने एमसीसी स्वीकार्य नभएको बताए ।

उनले एमसीसी कुनै हालत लागु हुन नदिने बताएका छन् । ‘एमसीसी दलालहरूको कमिसनको लोभमा जबरजस्त थोपर्न खोजिएको छ, यो हामीलाई स्वीकार्य छैन्’, विप्लवले भनेका छन्, ‘हामी कुनै पनि मुल्यमा एमसीसी थोपर्न दिँदैनौं, यसलाई असफल पार्छौैं ।’

विप्लवले केहि डलरेवादीले एमसीसीमार्फत अमेरिकाको गुलामी गराउन खोजेको बताए । ‘यहाँ डलरको कुरा गरिएको छ, ५० करोड डलरको कुरा गरिएको छ’, विप्लवले भनेका छन्, ‘के तपाईँ केहि करोड डलरमा अमेरिकीहरुको गुलामी बन्न तयार हो ? के राष्ट्रिय सार्वभौमिकता सिध्याउन तयार हो ?’

विप्लवले ५० करोड डलरले नेपालको कायापलट हुने भनि फैलाइएका भ्रम लाजमर्दो भएको बताए । ‘प्रधानमन्त्रीदेखि कतिपय मन्त्रीले एमसीसीको पैसाले सम्बृद्धि हासिल गर्न सकिने बताएका छन्’, विप्लवले प्रश्न गरेका छन्, ‘ अमेरिकाले दिएको ५० करोड डलरले के नेपालको कायापलट हुन्छ ?’