Sansar News
२८ भदौ, पोखरा । गण्डकी प्रदेशमा १७१ जना नयाँ संक्रमित थपिएका छन् ।
प्रदेशको स्वास्थ्य निर्देशनालयका अनुसार प्रदेशमा सोमवार गोरखामा ६, लमजुङमा ३, तनहुँमा ९, कास्कीमा १००, बाग्लुङमा २, स्याङजामा २४ र नवलपरासीपूर्वमा २७ गरी १७१ जना नयाँ संक्रमित थपिएका छन् । आज थपिएकामा ८६ महिला र ८५ जना पुरुष रहेका छन् ।
सोमवार थपिएका १७१ जनासँगै प्रदेशमा हालसम्म ८३ हजार ६७२ जनामा कोरोना संक्रमण पुष्टि भएको छ भने ती मध्ये ८० हजार ५९८ जना निको भइसकेका छन् । सोमवार प्रदेशमा १७१ जना संक्रमणबाट मुक्त भएका छन् ।
गण्डकी प्रदेशमा सोमवार ४ जिल्लामा सं क्रमितको संख्या शून्य रहेको छ भने लामो समयपछि प्रदेशमा सोमवार मृत्यु हुनेको संख्या शून्य रहेको छ ।
प्रदेशमा हालसम्म १३३२ जनाले संक्रमणबाट ज्यान गुमाइसकेका छन् ।
निर्देशनालयका अनुसार प्रदेशमा हाल १७४२ सक्रिय संक्रमित रहेका छन् । ती मध्ये १६६० जना होम आइसोलेशनमा र अन्यको विभिन्न अस्पताल तथा आइसोलेशन सेन्टरमा उपचार भइरहेको निर्देशनालयले जनाएको छ । प्रदेशमा पछिल्लो २४ घण्टामा ९२९ वटा नमुना परीक्षण गरिएको छ ।
वि.सं.२०७८ भदौ २८ सोमवार ११:४२ मा प्रकाशित
