Sansar News
काठमाडौं । नेपाली कांग्रेसको १४ औं महाधिवेशनअन्तर्गत सहमहामन्त्री पदका लागि भएको निर्वाचनको मतगणना सुरु भएको छ । महामन्त्री पदको मतगणना सकिएलगत्तै कांग्रेसको केन्द्रीय निर्वाचन समितिले सहमहामन्त्रीको मतगणना सुरु गरेको हो ।
कांग्रेस केन्द्रीय कार्यालयमा सुरु भएको मतगणनामा आठमध्ये तीन क्लष्टरको मतगणना गरिने निर्वाचन समितिले जनाएको छ । आज सहमहामन्त्रीतर्फको महिला, दलित, आदिवासी जनजातितर्फको मतगणना गरिनेछ । बाँकी पाँच क्लष्टरको मतगणना भोली गरिने जनाइएको छ ।
महिला क्लष्टरमा शेरबहादुर देउवा प्यानलबाट महालक्ष्मी उपाध्याय ‘डिना’ र शेखर कोइराला प्यानलबाट कमला पन्त उम्मेदवार छन् ।
दलित क्लस्टरको सहमहामन्त्रीमा शेरबहादुर देउवा प्यानलबाट मानबहादुर विश्वकर्मा र शेखर कोइराला प्यानलबाट जीवन परिवार उम्मेदवार छन् । त्यस्तै गंगा सुनारले स्वतन्त्र उम्मेदवारी दिएका छन् ।
त्यस्तै आदिवासी जनजाति तर्फको सहमहामन्त्रीमा शेरबहादुर देउवा प्यानलबाट भीष्मराज आङ्देम्बे र शेखर कोइराला प्यानलबाट र विकास लामा उम्मेदवार छन् ।
वि.सं.२०७८ पुस १ बिहीवार १७:५० मा प्रकाशित
