हामी सबैकाे संसारन्यूज

काठमाडौं । रक्षामन्त्रीको पदबाट राजीनामा दिएका डा.मिनेन्द्र रिजालले सक्रिय राजनीतिबाटै टाढिन सक्ने सम्भावना रहेको बताएका छन् । बिहीबार मन्त्री पदबाट राजीनामा दिएलगत्तै पत्रकार सम्मेलन गरेका उनले सक्रिय राजनीतिबाट टाढिने सम्भावना रहेको बताएका हुन् ।

‘कतै राजनीतिबाट अलग हुने संकेत गर्न खोज्नुभएको त होइन ?’ भन्ने सञ्चारकर्मीको प्रश्नमा उनले सम्भावना रहेको बताए । सञ्चारकर्मीको प्रश्नमा उनले भने, ‘मैले त्यस्तो संकेत गरेको होइन । तर, सम्भावना छँदैछैन भन्दिनँ ।’

तथापी रिजालले आफु निष्कर्षमा भने नपुगिसकेको बताएका छन् । उनले राजनीतिबाट टाढिने अवस्था आए सार्वजनिक रुपमै जानकारी दिने पनि बताए ।

कांग्रेस महामन्त्रीको प्रतिस्पर्धामा हार्ने संकेत देखेसँगै रिजालले मन्त्री पदबाट राजीनामाको घोषणा गरेका थिए । उनले आफ्नो राजीनामा प्रधानमन्त्री शेरबहादुर देउवालाई बुझाइसकेका छन् ।

महामन्त्रीका उम्मेदवार बनेका रिजालले ८०९ मत मात्रै पाएका थिए । शेखर कोइराला प्यानलबाट उम्मेदवार बनेका रिजाल हारे पनि उनकै प्यानलका अर्का उम्मेदवार गगन थापाले भने निकै राम्रो लोकप्रिय मतसहित महामन्त्रीमा विजय बनेका छन् ।