हामी सबैकाे संसारन्यूज

काठमाडौं । नेकपा (माओवादी केन्द्र) प्रदेश १ को अधिबेशनले पार्टीको प्रदेश अध्यक्षमा हर्कबहादुर नेम्वाङ (मिक्सो)लाई निर्वाचित गरेको छ ।

प्रदेश १ को नयाँ नेतृत्व चयनका लागि बुधबार बेलुका सम्पन्न मतदान पछि गरिएको मतगणना अनुसार नेम्वाङले १६९ मत ल्याएर प्रदेश अध्यक्षमा विजयी भएका हुन् । नेम्वाङका प्रतिस्पर्धी मुक्साहाङ मेयाङ्वो ‘मुकेश’ ले ६४ मत प्राप्त गरेका थिए ।

त्यसैगरी पार्टीको उपाध्यक्षमा देवान चाम्लिङ (१२०) शिवकुमार डाँगी (११३) र मणिकुमार साम्पाङले (१११) मत प्राप्त गरी विजयी भएका छन् भने सचिवमा गणेश उप्रेती ‘शुसील’ १४८ मत ल्याएर विजयी भएका छन् भने तीन सहसचिवमा कुमारी राई (११४), ऋषिराम ढुंगाना (९८) र सागर किराती (७३) मतसहित विजयी भएका छन् । साथै कोषाध्यक्षमा रेवतराज पुरी (गगन) ले ९३ मत प्राप्त गरेर कोषाध्यक्षमा विजयी भएका छन् ।

नेकपा माओवादी केन्द्रको यहि मंसिर २५ र २६ गते भएको सम्मेलनमा पाँचवटा प्रदेशमा सहमतिबाट नेतृत्व चयन गरिएको थियो भने बागमती र प्रदेश १ मा भने नेतृत्वका आकांक्षी धेरै भएपछि निर्वाचनमै जानु परेको थियो ।

प्रदेश सदस्यमा सहमित भएपनि नौ पदाधिकारीका लागि भएको उक्त निर्वाचनमा २५९ मतदाता रहेका थिए । जसमा २४० जनाले मात्र मतदान गरेका थिए भने बाँकी १९ मा केही मत बदर र केही उनुपस्थित रहेको निर्वाचन समितिले जनाएको छ ।