Sansar News
काठमाडौं । वाग्मती प्रदेशका मुख्यमन्त्री राजेन्द्र पाण्डेले चौथो पटक मन्त्रिपरिषद् विस्तारको तयारी गरेका छन् । ८ वटा मन्त्रालय विभाजन गरेर १४ वटा पुर्याएका मुख्यमन्त्री पाण्डेले सत्तागठबन्धनमा रहेको कांग्रेसले प्राप्त गरेको मन्त्रालयमा मन्त्री नियुक्त गर्न लागेका हुन् ।
पाण्डेले यसअघि नै गठबन्धनमा रहेको माओवादी केन्द्र र नेकपा (एकीकृत समाजवादी)ले पाएको कोटाबाट मन्त्री नियुक्त गरिसकेका थिए । बताइएअनुसार कांग्रेसबाट तीन जना मन्त्री र दुईजना राज्यमन्त्रीको शपथ ग्रहण गराउने तयारी भइरहेको छ ।
यी हुन् मन्त्रीको सूचीमा परेका नाम
कांग्रेसले आफ्नो कोटामा परेको मन्त्रीको नाम करिब–करिब टुंगो लगाईसकेको छ । कांग्रेसको सूचीमा राधा घले, बलराम सुवेदी, दीपेन्द्र श्रेष्ठ, सन्त चेपाङ र रजनी जोन्छेको नाम परेको छ । जसमध्ये चेपाङ र जोन्छेलाई राज्यमन्त्री बनाउने तयारी रहेको बुझिएको छ ।
कांग्रेसले आफ्नो भागमा परेको उद्योग वाणिज्य तथा आपूर्ति, संस्कृति तथा पर्यटन र भूमि व्यवस्था, सहकारी तथा गरिबी निवारण मन्त्रालयको जिम्मेवारी पाउने पक्का छ । यसअघि कांग्रेसबाट भौतिक पूर्वाधार र स्वास्थ्य मन्त्री नियुक्त भइसकेको छन् ।
वि.सं.२०७८ पुस ९ शुक्रवार १५:१३ मा प्रकाशित
