हामी सबैकाे संसारन्यूज

काठमाडौं । नेकपा (माओवादी केन्द्र)को आठौं राष्ट्रिय महाधिवेशनअन्तर्गत बन्दसत्रमा अध्यक्ष पुष्पकमल दाहाल ‘प्रचण्ड’ले पेश गरेको राजनीतिक प्रतिवेदन र देव गुरुङले प्रस्तुत गरेको विधान मस्यौदामाथि छलफल जारी छ । बिहीबार विभिन्न १३ समूहका नेताहरुले प्रतिवदेन र मस्यौदामाथि आफ्नो सुझाब राखिरहेका छन् ।

सुझाब राख्ने क्रममा प्रतिनिधिहरुले वरिष्ठ नेताको व्यवस्था गर्न माग गरेका छन् । बन्दसत्रमा समूहगत छलफलको निष्कर्ष प्रस्तुत गर्ने क्रममा समूह १३ का टोली नेता गोपाल शर्माले भविष्यमा हुनसक्ने पार्टी एकतालाई मध्यनजर गर्दै विधानमा वरिष्ठ नेताको व्यवस्था गर्न माग गरेका हुन् ।

उनले अहिलेकै विधानमा त्यस्तो व्यवस्था गरिए भविष्यमा सहज हुने तर्क गरे । माओवादी विधान संशोधनको प्रस्तावमा वरिष्ठ उपाध्यक्षसहित १५ सदस्यीय पदाधिकारीको व्यवस्था गरिएको छ ।

माधवकुमार नेपाल नेतृत्वको एकीकृत समाजवादी, उपेन्द्र यादव नेतृत्वको जसपालगायत पूर्वमाओवादी घटकहरुबीच पार्टी एकताको चर्चा छ । बन्दसत्रमा विशेषतः पूर्वमाओवादी घटकहरुबीचमा एकता गर्नुपर्ने धारणा नेताहरुले राखेका छन् ।