हामी सबैकाे संसारन्यूज

काठमाण्डौं । नेकपा माओवादी केन्द्रको जारी आठौं महाधिबेशनका क्रममा माओवादीभित्रका १० धनाढ्यको नाम सार्वजनिक गर्न माग गरिएको छ ।

विहीवारको चालू बन्दसत्रमा आफ्ना निष्कर्ष राख्ने क्रममा प्रचण्डको प्रतिवेदनभित्र माओवादीभित्रका १० धनाढ्यको नाम सार्वजनिक गर्न माग गरिएको हो ।

यसबाहेक पार्टी छोड्दै नयाँ पार्टी बनाउँदै वा जाँदै र फर्कदै गर्दा पार्टीमा झन ठुलो स्थान दिइने प्रणालीले पार्टीभित्र इमान्दार कार्यकर्ताहरुमा निराशा छाएको निष्कर्ष समेत निकालिएको छ ।

नेकपा (माओवादी केन्द्र) को लुम्बिनी प्रदेश समूह ८ बाट बन्दसत्रको चौथो दिनमा सहभागी माओवादी प्रतिनिधिहरुले त्यस्तो विकृतिबाट पार्टी गाँजिएको भन्दै पार्टी छाडेर फेरि फर्किनेहरुलाई एकतह घटुवा गर्नुपर्ने निष्कर्ष निकालेका हुन् ।

सो समुहका प्रमुख सुदर्शन बरालले प्रचण्डको उमेर, स्वास्थ्य र स्वतन्त्रताका बाबजुद दस्तावेजले धेरैकुरा उजागर गरेको बताउँदै संसारका १० धनाढ्यको साटो माओवादी भित्रका १० धनाढ्यको नाउँ उल्लेख गर्न माग भएको सुनाएका थिए ।

उनको समुहमा जनयुद्धमा सहभागी हुनेहरुलाई गणतन्त्र सेनानीको रुपमा ‘भेट्रान पदक’ दिइनुपर्ने विषय समेत राखेका थिए ।