Sansar News
काठमाडौं । विवेकशील साझा पार्टीले पृथ्वी जयन्तीलाई ‘नेपाल दिवस’ रुपमा मनाउन माग गरेको छ ।
सो पार्टीका अध्यक्ष रवीन्द्र मिश्रले संसारका अधिकांश देशहरूमा विशिष्ट महत्त्वका व्यक्तिहरुको निश्चित दिनमा राष्ट्रिय दिवस मनाइने र त्यो स्थायीरुपमा हुने गरेको बताउँदै पृथ्वी जयन्ती तथा राष्ट्रिय एकता दिवसलाई ‘नेपाल दिवस (Nepal Day)’ का रूपमा मनाउन माग गरेका छन् ।
नेपालको हकमा निश्चित राष्ट्रिय दिवस कुनै पनि नभएकाले पृथ्वी जयन्ती तथा राष्ट्रिय एकता दिवस नै ‘नेपाल दिवस’ का लागि सबैभन्दा उपयुक्त दिन हुनसक्ने धारणा आफुहरुको रहेको मीश्रले उक्त विज्ञप्तिमा उल्लेख गरेका छन् ।
संसारका कुनै पनि एकीकरणकर्ता विवादरहित हुँदैनन् र छैनन् । तर तिनै विवादलाई लिएर पृथ्वीनारायण शाहको अवमूल्यन गर्नु उपयुक्त हुँदैन । उनको दूरदर्शिता र दिव्य उपदेश शान्त, स्वाभिमानपूर्ण, सार्वभौमसत्ता सम्पन्न र संवृद्ध नेपाल निर्माणका लागि आज पनि उत्तिकै सान्दर्भिक छ,’ विज्ञप्तिमा भनिएको छ, ‘राष्ट्रिय एकता दिवसका दिन सार्वजनिक बिदा दिइयोस् भनी हामीले विगतमा गरेको मागलाई पुनः दोहो¥याउँछौ। अनावश्यक रूपमा अनेकौँ बिदाहरू दिएर राष्ट्रिय एकता दिवसमा दिइने सार्वजनिक बिदा कटौती गर्नु अत्यन्तै खेदजनक विषय हो।’
सो पार्टीले नेपाली रुपैयाँमा पृथ्वीनारायण शाहको तस्बिर अङ्कित गर्न माग गर्दै हरेक सरकारी कार्यालयमा ससम्मान उनको तस्बिर राख्न निर्देशन दिइयोस् भन्ने माग समेत गरेको छ ।
विववेकशील साझाले पृथ्वी जयन्ती तथा राष्ट्रिय एकता दिवसका अवसर पारेर विवेकशील साझा पार्टीले पौष २७ गतेदेखि ‘मेची–महाकाली राष्ट्रिय एकता यात्रा’ सुरु गर्ने जनाएको छ ।
‘उक्त यात्रा माघ १६ गते शहीद दिवसका दिन अन्त्य हुनेछ । उक्त यात्रामा जहाँ, जसरी सम्भव हुन्छ, सहयोग र सहभागिताका लागि सम्पूर्ण नेपालीहरूमा विवेकशील साझा पार्टी हार्दिक अपिल गर्दछ ।’ सो पार्टीका प्रवक्ता शरदराज पाठकद्धारा जारी विज्ञप्तिमा उल्लेख छ ।
वि.सं.२०७८ पुस २० मंगलवार १२:४९ मा प्रकाशित
