Sansar News
काठमाडौं । झारफुकका लागि भन्दै २२ दिन अगाडि माताकोमा छोडेकी छोरीको मृत्यु भएपछि एक परिवार पीडामा परेको छ ।
सिन्धुपाल्चोक घर भई भक्तपुर मध्यपुर ठिमी बस्ने १४ वर्षीया बालिका ठकुरीको झारफुक गर्ने उक्त घरमा शनिबार बिहान वेहोस भएपछि माताले परिवारलाई खबर गरेकी थिइन् ।
नागार्जुन नगरपालिका–१ रानीवन पानीट्याङ्की नजिक घर भाडामा लिई बस्ने माता भनिने ४८ वर्षीया उमा शाही ठाकुरीकोमा उपचारका लागि भन्दै छोडेकी छोरी बेहोस भएपछि थप उपचारका लागि मनमोहन मेमोरियल अस्पताल लगिएकोमा बालिकाको मृत्यु भएको चिकित्सकले घोषणा गरेका थिए ।
उक्त घटनामा महानगरीय प्रहरी वृत्त स्वयम्भूबाट खटिएको प्रहरीले माता भनिने ठकुरीलाई पक्राउ गरेको छ ।
बालिकालाई उनकै आमाले २२ दिन पहिले उपचारका लागि उक्त घरमा ल्याई छोडेको अनुसन्धानमा खटिएको प्रहरीले जनाएको छ ।
ठकुरी उपर कर्तव्य ज्यान कसूरमा जिल्ला अदालत काठमाडौंबाट ५ दिन म्याद थप गरी आवश्यक अनुसन्धान भइरहेको महानगरीय प्रहरी परिसर काठमाडौंले जनाएको छ ।
टाउको दुख्ने समस्या रहेकी बालिकालाइ माता भनिने ठकुरीले झारफुक गरेर निको बनाउँछु भनेपछि बालिकाकी आमाले पुष ३ गते बालिकालाई आश्रममा छोडेकी थिइन् ।
वि.सं.२०७८ पुस २६ सोमवार १३:५३ मा प्रकाशित
