हामी सबैकाे संसारन्यूज

काठमाडौं । काठमाडौं उपत्यकाका धेरै ठाउँमा विद्युत आपूर्तिमा समस्या देखिएको छ । निरन्तरको झरि र चिसो बढिरहेका बेला विद्युत आपूर्तिमा समस्या देखिएको हो । बढ्दो चिसोमा विद्युत आपूर्ति नहुँदा मानिसहरु समस्यामा परेका छन् ।

गत पुष दोस्रो साता पनि काठमाडौं उपत्यकामा विद्युत आपूर्तिमा यस्तै प्रकृतिको समस्या देखिएको थियो । धेरै ठाउँमा विद्युत आपूर्तिमा समस्या आएको थियो । पुष दोस्रो साता आएको समस्या जस्तै अहिले पनि समस्या देखिएको हो ।

तर, समस्या आउँदैन भनेका थिए कुलमानले

विद्युत आपूर्तिमा निरन्तरको समस्या देखिएपछि प्राधिकरणका कार्यकारी निर्देशक कुलमान घिसिङले पुस १६ मा पत्रकार सम्मेलन नै गरेर विद्युत आपूर्तिमा समस्या नआउने दाबी गरेका थिए । उनले समस्याहरु दिगो ढंगले नै समाधान गर्न लागिएको पनि बताएका थिए । तर, प्राधिकरण प्रमुख घिसिङको भनाई भने महिना दिन पनि टिक्न सकेन ।

प्राधिकरणले अहिले देखिएको समस्या हावाहुरी र वर्षाको कारण आएको भनेको छ । प्राधिकरणका प्रवक्ता सुरेशबहादुर भट्टराई धेरै ठाउँमा समस्या समाधान भइसकेको बताए । उनले लोड बढेको कारण समस्या आएको भन्ने विषय सही नभएको पनि दाबी गरे । भट्टराईका अनुसार विद्युत नेटवर्क गतिलो नहुँदा विद्युत आपूर्तिमा समस्या आएको हो ।

“बुझ्नुपर्ने कुरा, हाम्रो विद्युत नेटवर्क राम्रो छैन्, वर्षात् भएसँगै हावाहुरीले डिस्टर्भ गरिहाल्छ, यसलाई अन्यथा मान्न मिल्दैन, हाम्रो नेटवर्क यूरोप–अमेरिकाको जस्तो नभएको कारण हावाहुरी र पानीले डिस्टर्भ गर्ने कुरा स्वभाविक हुन्छ”, भट्टराईले भनेका छन्, “हामी मर्मतमै छौं, समाधान हुँदै जान्छ ।”

भट्टराईले लोड बढेर समस्या भने नआएको बताए । “नर्मल लोडभन्दा ३ सय मेगावट लोड घटेको छ, अहिले उपत्यकाको लोड करिब १२६० मेगावट छ, यो लोड बढेर समस्या आएको होइन ।”

भट्टराईले भूमिगत रुपले विद्युत नेटवर्क विस्तार नगरी समस्या समाधान नहुने बताए । यस्तो समस्याहरु आउने कुरालाई अन्यथा मान्न नमिल्ने उनको भनाई छ ।