Sansar News
काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ पदाधिकारी चयनका लागि आन्तरिक परामर्शमा जुटेका छन् । उनले निकटका नेताहरुसँग छलफल सुरु गरेका छन् ।
केन्द्रीय सदस्य गणेश शाहले बताएअनुसार पदाधिकारी चयनका लागि नेताहरुसँग राय सुझाब लिइरहेका छन् । शाहले बताएअनुसार सबै पद सहमतिमै टुंग्याउने प्रचण्डको तयारी छ ।
“अध्यक्ष ज्यूको तयारी सबैमा सहमतिबाटै गरौं भन्ने छ, उहाँले सोहिअनुसार छलफल पनि अगाडि बढाइरहनु भएको छ”, शाहले भनेका छन्, “सायद एक/दुई दिनमै एउटा खाका बन्छ ।”
उनले बाहिर चर्चा भएअनुसार आकांक्षी भएपनि हानाथाप नै नभएको बताए । सहमतीमै सबै कुरा टुंगीने उनको भनाई छ ।
माओवादीले महाधिवेशनमार्फत अध्यक्षसहित २९९ सदस्यीय केन्द्रीय सदस्यमध्ये २३७ चयन गरेको थियो । तर, वरिष्ठ उपाध्यक्षसहित अन्य पदको विषयमा भने टुंगो लगाएको छैन् ।
माओवादीले केन्द्रीय समिति बैठकमार्फत विधानतः पदाधिकारी, स्थायी समिति र पोलिटब्यूरो गठन गर्नेछ । साथै रिक्त केन्द्रीय सदस्य पदमा पनि पूर्ति गर्नेछ ।
माओवादीले पदाधिकारीसहित विभिन्न कमिटीको नेतृत्व टुंग्याउन माघ २७ मा केन्द्रीय समिति बैठक बोलाएको छ ।
वि.सं.२०७८ माघ २१ शुक्रवार १७:४९ मा प्रकाशित
