Sansar News
काठमाडौं । नेकपा एमालेका अध्यक्ष केपी शर्मा ओली प्रधानमन्त्री शेरबहादुर देउवालाई भेट्न बालुवाटार जाने भएका छन् ।
प्रधानमन्त्री पदबाट हटेको सातमहिनापछि पहिलोपटक ओली र देउवाको आज दिउँसो ४ बजे प्रधानमन्त्री निवास बालुवाटारमा भेटघाटको कार्यक्रम रहेको ओलीको सचिवायल श्रोतले जनाएको छ ।
प्रमुख प्रतिपक्षी दलका नेता समेत रहेका ओली र देउवाको भेटघाटमा स्थानीयतहको निर्वाचन, एमसीसी लगायतका विषयमा छलफल हुने पनि बताइएको छ ।
यसअघि प्रधानमन्त्रीले डाकेको सर्वदलीय बैठकमा उपस्थित नभएका ओली योपटक भने बालुवाटार जाने तयारीमा रहेको स्रोतले जनाएको छ । केही दिन अगाडि प्रधानमन्त्री देउवा ओलीलाई भेट्न ओली निवास बालकोटनै पुगेका थिए ।
यतिबेला अमेरिकी परियोजना एमसीसी सम्झौतालाई संसदमा प्रवेश गराएर संसदबाटै अनुमोदन गराउने पक्षमा देउवा रहेका छन् भने सत्ता गठबन्धन दलभित्रकै नेकपा माओवादी केन्द्र र एकिकृत समाजवादी पार्टी एमसीसी सम्झौतामा रहेका केही असहमतिका बुँदाहरुलाई संशोधन गरेर मात्र पास गर्न सकिने अडान लिइरहेका छन् ।
नेकपा एमालेले सभामुख अग्नि सापकोटालाई हटाउन प्रस्ताव ल्याएमा कांग्रेसलाई सघाउने बताउँदै आएको छ । यद्यपी एमसीसीको विषयमा भने एमालेले केही समय आफ्ना धारणा सार्वजनिक नगर्ने बताउँदै आएको छ । माघ १९ गते बसेको पार्टीको सचिवालय बैठकले स्थानीय निकायको निर्वाचन मिति नजिकिएकोले त्यसको तयारीमा लाग्ने निर्णय गरेको समेत बताएको थियो । file photo
वि.सं.२०७८ माघ २३ आइतवार १३:४७ मा प्रकाशित
