हामी सबैकाे संसारन्यूज

काठमाडौं । राष्ट्रिय प्रजातन्त्र पार्टीका निवर्तमान अध्यक्ष कमल थापाले पार्टीबाट अलग भएको घोषणा गरेका छन् । मंगलबार हेटौडामा पत्रकार सम्मेलन गरेर थापाले पार्टीबाट अलग हुने घोषणा गरेका हुन् ।

उनले पार्टीभित्र सैद्धान्तिक विचलन र गलत प्रवृत्ति हावी भएको त्यसलाई सुधार गरेर जाने आफ्नो चाहनाको सुनुवाइ नभएकाले अलग भएको बताएका छन् ।

“अत्यन्त भारी मन तथा पीडाबोधका साथ मैले राष्ट्रिय प्रजातन्त्र पार्टीबाट अलग हुने निर्णय लिएको छु”, पत्रकार सम्मेलनमा उनले भनेका छन्, “पार्टीभित्र देखा पर्न थालेको सैद्धान्तिक विचलन तथा गलत प्रवृत्तिलाई सुधार गरेर मेरो बाँकी क्रियाशील राजनीतिक जीवन पार्टीभित्रै बिताउने र पार्टीमै रमाउने उत्कट चाहना भएतापनि आफ्नो कुराको सुनुवाइ नहुने भएपछि मैले यो अप्रिय निर्णय लिन बाध्य भएको हुँ ।”

थापाले महाधिवेशनको क्रममा निर्मल निवासबाट हस्तक्षेप भएको भन्दै छानबिनको माग राख्दै आएका थिए । उनले दुई पटकसम्म अध्यक्ष राजेन्द्र लिङ्देनलाई पत्र लेख्दै छानबिन नगरे पार्टीमा बस्न नसक्ने बताएका थिए ।

सोमबार मात्रै बेग्लै भेला राख्दै उनले पार्टीबाट अलग हुने अवस्था आएको बताएका थिए । थापाले हिन्दु अभियान केन्द्रीत पार्टी खोल्ने तयारी गरेको बुझिएको छ ।