हामी सबैकाे संसारन्यूज

काठमाडौं । सत्तारुढ नेपाली कांग्रेसले अमेरिकी सहयोग नियोग मिलेनियम च्यालेन्ज कर्पोरेसन (एमसीसी)सँगको सम्झौता जसरी पनि पारित गर्नुपर्ने निर्णय गरेको छ । बिहीबार पार्टी कार्यालय सानेपामा बसेको बैठकले गठबन्धन तोडिए पनि एमसीसी पास गर्नुपर्ने निर्णय गरेको हो ।

कांग्रेस केन्द्रीय सदस्य एवं पूर्वमहामन्त्री शशांक कोइरालाले बताएअनुसार बैठकले एमसीसीलाई निःशर्त पारित गरेर जानुपर्ने निष्कर्ष निकालेको छ । “बैठकमा एमसीसीका विषयमा छलफल भयो, एमसीसी जसरी पनि पारित गर्नुपर्ने निष्कर्ष बैठकको छ”, बैठकको छलफलबारे कोइरालाले भनेका छन् ।

कोइरालाले बताएअनुसार एमसीसी पारित गर्नेमा सबै नेताहरु एकमत छन् । एमसीसी नेपालको विकाससँग जोडिएकाले पारित गर्नुको विकल्प नरहेको धेरै नेताहरुको धारणा छ ।

बैठकमा सभापति शेरबहादुर देउवाले सत्ता गठबन्धनभित्र एमसीसीको विषयमा भइरहेको छलफलबारे जानकारी गराएका थिए । उनले नेता रामशरण महतलाई एमसीसीको विषयमा टिपोट गरी स्पष्ट पार्न सुझाएका थिए ।