हामी सबैकाे संसारन्यूज

काठमाडौं । सत्तारूढ नेकपा (एकीकृत समाजवादी) एमसीसीको विपक्षमा उभिने भएको छ । सोमबार बसेको समाजवादीको सचिवालय बैठकले एमसीसीको विपक्षमा उभिने निर्णय गरेको प्रवक्ता जगन्नाथ खतिवडाले बताए।

उनले आफ्नो पार्टीका सबै सांसद र मन्त्रीहरूले एमसीसीको विपक्षमा मतदान गर्ने बताए। एकीकृत समाजवादीले पहिलो पटक एमसीसीको विपक्षमा मतदान गर्ने निर्णय गरेको हो।

“एमसीसीसम्बन्धी प्रस्तावको विपक्षमा सबै सांसद र मन्त्रीहरूले मतदान गर्नुहुन्छ, यसमा स्वविवेक प्रयोग गर्ने भन्ने हुन्न”, खतिवडाले भने, “हामी अरु दललाई पनि विपक्षमा मतदान गर्न आग्रह गर्छौं ।”

उनले विपक्षमा मतदान गर्दा सरकारमा बस्ने नबस्ने कुरा खुलाएनन् तर, सरकार राष्ट्रियताभन्दा ठूलो कुरा नभएको उनको भनाई छ ।

एमसीसीको विषयमा एकीकृत समाजवादीभित्र धेरै धार देखिएका छन् । केही नेताहरु निःशर्त एमसीसी अस्वीकार गर्ने पक्षमा छन् भने केही संशोधन भएमा स्वीकार गर्न सक्ने भन्ने पक्षमा छन् । आइतबार एमसीसी टेबल गर्दा नेता झलनाथ खनालले उठेरै नाराबाजी गरेका थिए ।