हामी सबैकाे संसारन्यूज

ललितपुर । नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ले वर्तमान प्रधानमन्त्री सुशीला कार्कीको नियुक्ति तत्कालीन कामचलाउ प्रधानमन्त्री केपी शर्मा ओलीकै लिखित सिफारिसमा भएको दाबी गरेका छन् ।

शुक्रबार सम्पादकहरूसँगको अन्तरक्रियामा बोल्दै प्रचण्डले राष्ट्रिय सङ्कटको अवस्थामा आवश्यकताको सिद्धान्तअनुसार जेनजी आन्दोलनका युवाहरूको भावनालाई सम्मान गर्दै कार्कीलाई प्रधानमन्त्री नियुक्त गरिएको भए पनि संवैधानिक प्रक्रियाअनुसार ओली नै सिफारिसकर्ता रहेको बताए ।

‘कार्कीलाई प्रधानमन्त्री नियुक्तिमा सिफारिस गर्ने उहाँ (ओली) नै हो,’ प्रचण्डले भने, ‘केपी ओलीको लिखित सिफारिसकै आधारमा राष्ट्रपतिले सुशीला कार्कीलाई अन्तरिम सरकारको प्रधानमन्त्री नियुक्त गर्नुभएको हो । अहिले यो सरकार हावामा बनेको भन्न मिल्दैन, उहाँ नै सिफारिसकर्ता हो । हामी त्यस प्रक्रियाका साक्षी मात्रै थियौं,’ उनले स्पष्ट पारे ।

प्रचण्डले देश गम्भीर सङ्कट र चुनौतीपूर्ण अवस्थाबाट गुज्रिरहेको उल्लेख गर्दै यसको समाधानका लागि सर्वपक्षीय राजनीतिक सहमतिको आवश्यकता रहेकोमा जोड दिए ।
‘राष्ट्र सङ्कटमा छ भन्नेमा सबैको सहमति देखिएको छ,’ उनले भने, ‘अब राजनीतिक दल, नागरिक समाज, पत्रकार र बुद्धिजीवी सबैको साझा सहमतिको खाँचो छ ।’