हामी सबैकाे संसारन्यूज

काठमाडौं । संस्कृति, पर्यटन तथा नागरिक उड्डयनमन्त्री प्रेमबहादुर आलेले वर्षौंदेखी बक्यौता भुक्तानी नगरेको होटल याक एण्ड यतिलाई कारबाही गरेपछि क्यासिनो सञ्चालकहरुको तर्फबाट सरकारलाई रोयल्टी तिर्नेक्रम बढेको छ ।

फागुन ८ गते आइतबारसम्म सरकारको खातामा क्यासिनो कम्पनीबाट ८१ करोड रुपैयाँ राजस्व संकलन भएको पर्यटन विभागका होटल तथा क्यासिनो हेर्ने अधिकृत खेमराज जोशीले बताएका छन् ।

मन्त्री आलेले केही हप्ता पहिले क्यासिनोको रोयल्टी नतिर्नेको लाइसेन्स खारेज हुने चेतावनी दिएपछाडि क्यासिनो सञ्चालकले धमाधम रोयल्टी बुझाउन थालेको पर्यटन विभागले जनाएको छ । विभागका अनुसार क्यासिनो सञ्चालकले सरकारलाई भुक्तान गर्नुपर्ने बक्यौता रकम अब जम्मा रकम १ अर्ब ११ करोड ८४ लाख ४७ हजार रुपैयाँ मात्रै रहेको छ ।

यसैगरी मन्त्री आलेकै निर्देशनमा क्यासिनोको रोयल्टी वर्षौसम्म पनि नतिर्ने काठमाडौँको दरबारमार्गमा रहेको होटेल याक एण्ड यतीको लाइसेन्स खारेज गरिएको छ ।

पर्यटन विभागका अनुसार अहिलेसम्म १७ कम्पनीले रोयल्टी तिर्नुपर्ने बक्यौता बुझाइसकेका छन् । गोल्डेन फिङ्गर गेमिङ् जोन प्रालीले समेत नयाँ क्यासिनो व्यवसाय सञ्चालन गरेबापत २ करोड ५० लाख रुपैयाँ रोयल्टी बुझाएसँगै सरकारको खातामा क्यासिनो रोयल्टीबापत ८१ करोड रुपैयाँ रकम जम्मा भएको हो । अब छ वटा कम्पनीले रोयल्टी नवीकरण दस्तुर बुझाउन बाँकी रहेको विभागले जनाएको छ ।

मन्त्री आलेले आफ्नो मन्त्रालयमातहतमा रहेर गरिने क्रियाकलापलापलाई कानुनी दायरामा ल्याउनको लागि सक्रियतापुर्वक पहल गरिरहेका छन् । मन्त्री आलेले क्यासिनो सञ्चालन गरेर रोयल्टी भुक्तानी नगर्नेको तिनपुस्ते सार्वजनिक गर्न निर्देशन दिएसंगै विभागले रोयल्टी नतिर्ने क्यासिनो सञ्चालकको तीनपुस्ते विवरण समेत सार्वजनिक गरेको छ । जसकारण रोयल्टी तिर्न आनाकानी गर्ने व्यवसायीहरुलाई दबाब सिर्जना भएको छ ।