हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले एमसीसी अनुमोदन हुँदा खुशी लागेको प्रतिक्रिया दिएका छन् । सोमबार विशेष पत्रकार सम्मेलन गर्दै उनले एमसीसी अनुमोदन हुँदा देश दुर्घटनाबाट बच्यो भनेर खुशी लागेको बताएका हुन् ।

प्रचण्डले एमसीसीकै कारण शान्ति सम्झौता दुर्घटनामा पर्ने, संविधान डिरेल हुने र गठबन्धन टुट्यो भने धेरै चिज उल्टिने खतरा देखेपछि बीचको बाटो खोजेर एमसीसी अनुमोदन गरेको बताए ।

“राष्ट्रिय सहमति बनोस् भनेर लागे तर, भएन । यसले त शान्ति प्रक्रिया, संविधान र लोकतन्त्र खतरा पर्ने देखेँ”, प्रचण्डले भनेका छन्, “त्यसैले यो निर्णयमा पुगिएको हो, म खुसी छु, देश दुर्घटनाबाट बच्यो ।”

देशलाई दुर्घटनामा जान नदिन व्याख्यात्मक घोषणा गरेर एमसीसी अनुमोदनको लागि पार्टीमा निर्णय गराएको उनले बताए । एमसीसीलाई संसदबाट संकल्प प्रस्ताव पारित गर्ने नेकपा कालमा नै प्रस्ताव गरेको तर, त्यो बेला तत्कालिन प्रधानमन्त्री केपी शर्मा ओलीले अस्वीकार गरेको आरोप लगाएका छन् ।