हामी सबैकाे संसारन्यूज

काठमाडौं । गैरआवासीय नेपाली संघ (एनआरएनए) का अध्यक्ष कुमार पन्तले द्धन्द्धरत देश युक्रेनमा रहेका नेपालीहरुलाई पोल्याण्ड प्रवेश गराउने कोशिष जारीरहेको बताएका छन् ।

युद्धका कारण युक्रेन छोडेर सीमावर्ती देश प्रवेश गर्ने नेपाली दिदीबहिनी तथा दाजुभाइको अवस्था बुझ्न युक्रेन र पोल्याण्डको सीमाना मेडिकामा रहेको बताउँदै अध्यक्ष पन्तले अझै पनि केही नेपालीहरु युक्रेनपट्टिको समस्याका कारण पोल्याण्ड प्रवेश गर्न नसकेको बताएका छन् ।

‘हामीले उहाँहरुलाई सुरक्षित रुपमा पोल्याण्ड प्रवेश गराउने कोसिस जारी राखेका छौं,’ अध्यक्ष पन्तले भनेका छन्, ‘कूटनीतिक सहजीकरण कसरी गर्न सकिन्छ भन्नेबारे महामहिम राजदूतज्यू रामकाजी खड्कासँग छलफल पनि जारी छ । यस युद्धको कठिन घडीमा चाहँदाचाहँदै पनि कतिपय विषय भनेजसरी अघि बढ्न सकिरहेको छैन ।’

अध्यक्ष पन्तले आफुहरुले प्रयास जारी राखेको बताउँदै युक्रेनमा रहेका नेपालीहरुलाई केही समय धैर्य गर्न समेत अनुरोध गरेका छन् ।

‘हिजो सिमानामा रहनुभएका साथीहरुमध्ये करिब ५० प्रतिशत वार्सालगायतका सहरमा राति नै यहाँ अहोरात्र खटिरहनुभएका साथीहरुको सहयोगमा रेल र बसमा अहिले गन्तव्यतर्फ जाँदै हुनुहुन्छ,’ पन्तले सामाजिक संजालमा लेखेका छन्, ‘यस क्षेत्रमा रहनुभएका युवा नेपालीहरु, विभिन्न राजनैतिक दलसँग आस्था राख्ने संस्थाहरु, यहाँका नेपाली समुदाय रातदिन खटिरहनुभएको छ । उहाँहरुको यो हार्दिकता सक्रियताप्रति आभार प्रकट गर्दछु ।’

अध्यक्ष पन्तले पोल्याण्डका सीमा क्षेत्रमा रहेका नेपालीहरुसँग समन्वय गरेर आवश्यक खर्च र व्यवस्थापनमा संस्थाले काम सुरु गरिसकेको पनि जानकारी दिएका छन् । अध्यक्ष पन्तले हाल मुख्य गरी युक्रेनी सीमा पार गर्न र पोल्याण्ड प्रवेश गरेकालाई अन्य सहरमा लगेर राख्न सहजीकरण आवश्यक परेकाले त्यस कार्यमा आफु सक्रिय रुपमा लागिरहेको समेत बताएका छन् ।

युक्रेनबाट बाहिरीएका मध्ये पोल्याण्डमा २३२, स्लोभाकियामा ३९, रोमानियामा २३ र हँगरीमा तीनजना पुगेका छन् । साथै युक्रेनको राजधानी किभ र खार्किभमा रहेका नेपालीहरु सीमा क्षेत्रमा जाने क्रम जारी रहेको बताइएको छ ।

अध्यक्ष पन्तले युक्रेनमा झण्डै १ हजार नेपाली रहेकोमा सातसय नेपाली त्यहाँबाट बाहिरीनेक्रम जारी रहेको जानकारी दिएका छन् ।

त्यस्तै नेपाली दूतावास जर्मनीका राजदूत तथा युक्रेनका लागि आवासीय राजदूत रामजी खड्काले हालसम्म ६० नेपाली दूतावासको सम्पर्कमा आएको बताएका छन् ।