हामी सबैकाे संसारन्यूज

काठमाडौं । युक्रेनी राष्ट्रपति भोलोडिमिर जेलेन्स्कीले नेटो निकै कमजोर देखिएको टिप्पणी गरेका छन् । युक्रेनी समाचार च्यानल सास्पिल्नेसँग कुरा गर्दै जेलेन्स्कीले आफुहरुसँग गरेको व्यवहारले उनीहरु रुससँग निकै त्रसित भएको बताए ।

आफुँहरुलाई खुलेर समर्थन गर्न नै नेटो डराइरहेको उनको भनाई । “नेटोले या त अब हामीलाई स्वीकार गरिरहेको छ भन्नु पर्छ, वा खुलेर भन्नु पर्छ कि उनीहरू रुससँग डराउँछन्”, जेलेन्स्कीले भनेका छन्, “उनीहरूले हामीलाई किन स्वीकार गर्दैनन् ?”

जेलेन्स्कीले कसैले सहयोग नगरे पनि यूक्रेन रुससँग आत्मसमर्पण नगर्ने बताएका छन् । उनले यूक्रेन बहादुरहरुको देश भएको भन्दै अन्तिमसम्म लड्न तयार रहेको बताए ।

उनले युद्ध अन्त्य गर्ने सबालमा जुनसुकै शर्तमा भने आफुँ रुसी राष्ट्रपतिसँग छलफल गर्न तयार रहेको बताए । उनले वार्ताबाटै समाधान खोजिनुको विकल्प नरहेको बताए ।

रुस–युक्रेनबीच अहिलेसम्म कैयौं चरणको वार्ता भइसकेको छ तर समाधान भने निस्किएको छैन । दुई देशबीच युद्ध सुरु भएको २७ दिन भइसकेको छ । नेटो खुला रूपमा युक्रेनको पक्षमा नआएकोले, जेलेन्स्कीले युक्रेनलाई आफ्नो गठबन्धनमा समावेश गर्ने कि नगर्ने भनेर स्पष्ट पार्नुपर्छ भनेर माग गरिरहेका छन् ।

यो युद्धका कारण दुवै देशले ठूलो क्षति बेहोर्नु परेको छ । युक्रेनको तुलनामा रुस निकै शक्तिशाली देश भए पनि यसले पनि धेरै पीडा भोगिरहेको छ । मार्च २ मा रुसको रक्षा मन्त्रालयले युद्धमा आफ्ना ५०० सैनिक मारिएको बताएको थियो। अर्कोतर्फ युक्रेनले भने १५ हजार रुसी सैनिक मारिएको दाबी गरेको छ । जबकि अमेरिकाले ७ हजारको मृत्यु हुने अनुमान गरेको थियो । रुस युक्रेनमा गहिरो प्रवेश गरेको छ ।