हामी सबैकाे संसारन्यूज

काठमाडौं । चिनिया विदेशमन्त्री वाङ यी तीनदिने औपचारिक भ्रमणका लागि आज नेपाल आउदै छन् ।

परराष्ट्रमन्त्री नारायण खड्काको निमन्त्रणमा तीनदिने औपचारिक भ्रमणका लागि नेपाल आउन लागेका विदेशमन्त्री वाङको भ्रमणका क्रममा नेपाल–चीनबीच भएका पुराना सम्झौता कार्यान्वयन तहमा लैजाने तथा केही नयाँ विषयमा सम्झौता हुने बताइएको छ ।

परराष्ट्र मन्त्रालयका अनुसार जलविद्युत् परियोजना, ट्रान्स हिमालयन सम्पर्क सन्जाल, बिआरआइ परियोजनासँग सम्बन्धीत विषयमा छलफल हुने बताइएको छ । साथै कोरोना महामारीपछिको आर्थिक पुर्नस्थापर्ना तथा भविष्यमा आइपर्ने महामारी जन्य संकटका विषयमा चीनले गर्न सक्ने आर्थिक सहयोगका विषयमा पनि खाका बनाइएको मन्त्रालयले जनाएको छ ।

त्यसैगरी केही नयाँ सम्झौता र सहमतिको तयारी रहेको र ती विषयका प्राथमिकताका आधारमा दुई देशको प्रतिनिधि मण्डलबीच हुने वार्ताले सम्झौताको आधार तय गर्ने पनि परराष्ट्र मन्त्रालयका चीन मामिला हेर्ने सहसचिव लोक बहादुर थापाले जानकारी दिएका छन् ।

तीनदिने नेपाल भ्रमणका क्रममा विदेशमन्त्री वाङले राष्ट्रपति विद्यादेवी भण्डारी र प्रधानमन्त्री शेर बहादुर देउवासँग शिष्टाचार भेटघाट तथा चैत १२ गते परराष्ट्रमन्त्री खड्कासँग दिपक्षय भेटघाटको कार्यक्रम रहेको बताइएको छ ।

त्यस्तै प्रमुख प्रतिपक्षी दल एमालेका अध्यक्ष केपी शर्मा ओली, माओवादी केन्द्रका अध्यक्ष पुष्पकमल दाहाल ‘प्रचण्ड’सँग पनि भेटघाटको कार्यक्रम रहेको बताइएको छ ।

गत फागुन १५ गते संसदबाट अमेरिकी सहयोग निकाय मिलेनियम च्यालेन्ज कर्पोरेशन (एमसीसी) परियोजना संसदबाट पारित भएसँगै छिमेकी देश चीनबाट हुन लागेको यो उच्चस्तरीय भ्रमणलाई अर्थपूर्ण रुपमा हेरिएको छ ।