हामी सबैकाे संसारन्यूज

काठमाडौं । नेकपा (एमाले)का अध्यक्ष केपी शर्मा ओलीले माओवादीहरुलाई मात्रै वामपन्थी भनेर बुझिएको भन्दै गुनासो गरेका छन् । सोमबार प्रगतिशील इन्जिनियर्स एसोसिएसन नेपालले आयोजना गरेको कार्यक्रममा बोल्दै उनले “वामपन्थी भनेपछि प्रचण्ड र माओवादीलाई बुझ्ने अवस्था” भएको बताए ।

उनले आफुँ कम्युनिष्ट भएको भन्दै प्रचण्डलाई कम्युनिष्ट भनेर बुझ्न नहुने बताए । “वामपन्थी भनेपछि मान्छेले प्रचण्ड सम्झिन्छन्, अनि कसरी हुन्छ !”, उनले भने, “ म कम्युनिस्ट हुँदा, प्रचण्ड कम्युनिस्ट हुनै सक्दैनन्। त्यो सम्भव नै छैन। दुइटा एउटै कुरा कसरी हुन्छ। उहाँ अकारण देशमा द्वन्द्व मच्चाउनुहुन्छ। म शान्तिको पक्षमा हुन्छु। उहाँ जातजातमा भिडाउन खोज्नुहुन्छ मान्छेलाई। म मिलाउन खोज्छु ।”

प्रचण्डले जात, धर्म र क्षेत्रीयताको मुद्दामा राजनीति गरिरहेको ओलीको आरोप छ । उनले प्रचण्डको कारण देशमा अस्थिरता निम्तिरहेको पनि बताए ।

प्रचण्ड वामपन्थी आन्दोलनलाई कमजोर पार्न लागिपरेको उनको भनाई छ । “उहाँ भत्काउने काम गर्नुहुन्छ, म बनाउने काम गर्छु। मैले एकता गराउने काम गरेँ। उहाँ फुटाएर हिँड्नुभयो”, उनले भनेका छन् ।

एक अर्को प्रसंगमा बोल्दै ओलीले पाँच दलीय गठबन्धन आफैं सकिने टिप्पणी गरेका छन् । निर्वाचनबाटै गठबन्धन सकिने ओलीको टिप्पणी छ ।

“पाँच दलीय गठबन्धन भन्नुहुन्छ नि, यो दुई दिनको केटाकेटीको खेल हो। अदालतले ल्याएर जोडजाड गरिदिएको पुतली। टालाटुली बटुली कति राम्रा पुतली भनेजस्तो यी टालाटुली बटुलेका पुतलीहरु राम्रा पनि छैन। टाला पनि मिलाएर बनाउन जानेको छैन”, उनले भने ।