हामी सबैकाे संसारन्यूज

काठमाडौं । अर्थमन्त्री जनार्दन शर्माले अर्थतन्त्रका समष्टिगत अवस्था सामान्य रहेको दाबी गरेका छन् । बाह्य क्षेत्रमा केही दबाब हुनुबाहेक अर्थतन्त्रका अन्य परिसूचकहरू सामान्य रहेको शर्माको भनाई छ ।

अर्थ मन्त्रालयमा सोमबार आयोजित पत्रकार सम्मेलनमा मन्त्री शर्माले तथ्याङ्क र अवस्थाले नै देशको अर्थतन्त्रमा कुनै ठूलो संकट नआएको उल्लेख गरेका हुन् । मन्त्री शर्माले फागुनसम्म कतिपय सूचकांक सुधारतिर गएको दाबी गरेका छन् । ऋण, विप्रेषण, अनुदार राजश्व संकलन वृद्धि भइरहेको भन्दै उनले अहिलेको दबाब कम हुने दाबी गरे।

उनले अर्थ व्यवस्थामाथि राजनीति नगर्न पनि आग्रह गरे। “जसरी यहाँ ठूलो संकट आयो, अब यो देश के के न हुन्छ भनेर जो गरिएको छ, तथ्याङ्क र अहिलेको हाम्रो अवस्थाले पनि के देखाउँछ भने हाम्रो अर्थतन्त्रमा कुनै ठूलो संकट आएको छैन”, शर्माले भनेका छन्, “अर्थतन्त्रलाई नियमित गतिमा चल्न दिनुपर्छ । राजनीतिकरण गर्नुहुँदैन ।”

मन्त्री शर्माले विदेशी लगानी बढाउने, विलासिताका सामानहरुको आयात कटौती गर्ने र उत्पादनका क्षेत्रमा लगानी बढाउने बताए। अर्थ मन्त्रालयले आवश्यकता अनुसारको कदम चाल्दै जाने उनको भनाइ छ।

सरकारले विलासिताका सामानहरुको आयात कटौती गर्नेलगायतका निर्णयहरु गरेको जानकारी दिएका छन् । उनका अनुसार मन्त्रालयले आवश्यकता अनुसारको कदम चाल्दै जाने छ।