हामी सबैकाे संसारन्यूज

काठमाडौं । निर्वाचनमा ६ करोड खर्च भएको बताउने नेपाली कांग्रेसका नेता शशांक कोइरालालाई निर्वाचन आयोगले स्पष्टीकरण सोधेको छ । सोमबार आयोगले कोइरालालाई ७ दिनभित्र जवाफ पेश गर्नेगरि स्पष्टीकरण सोधेको हो ।

कोइरालाले ०७४ मा भएको प्रतिनिधिसभाको निर्वाचनमा २१ लाख ७५ हजार रुपैयाँ खर्च भएको तथ्यांक निर्वाचन आयोगलाई पेश गरेका थिए । तर, एक सञ्चारमाध्यमसँगको कुराकानीमा उनले ६ करोड खर्च भएको अभिव्यक्ति दिएका थिए ।

“पहिलो चुनावमा मेरो खर्च ८० हजार रुपैयाँ थियो, दोस्रो चुनावमा तीन करोड र लास्ट चुनावमा ६ करोड”, उनले भनेका थिए, “ल भन्नुस् त तपाईंहरु कोही चुनाव लड्न चाहनुहुन्छ, मेरो क्षेत्रबाट ? म छोड्न तयार छु, तपाईंहरुले कम्तीमा ६/७ करोड त्यहाँ (खर्च) गर्नुपर्छ।”

निर्वाचन आयोगले तत्कालिन समय खर्चको सीमा जम्मा २५ लाखसम्म तोकेको थियो । आयोगले उक्त अभिव्यक्ति चर्चामा आएपछि स्पष्टीकरण सोधेको हो ।

कोइराला २०७४ सालमा नवलपरासी पूर्व–१ बाट विजयी भएका थिए ।