Sansar News
काठमाडौं । नेपाल प्रहरीको केन्द्रीय अनुसन्धान ब्युरो (सीआईबी)ले बैंकिङ कसुर तथा सजाय ऐन, २०६४ अन्तर्गतको मुद्दामा संलग्न चार जना प्रतिवादीलाई पक्राउ गरेको छ।
नेपाल राष्ट्र बैंकको पत्र जाहेरीका आधारमा नेपाल सरकार वादी रहेको तथा शशिधर शर्मा समेत प्रतिवादी रहेको बैंकिङ कसुर मुद्दामा संलग्न उनीहरूलाई सम्मानित उच्च अदालत, पाटन, ललितपुरबाट पक्राउ अनुमति लिएपछि मंगलबार पक्राउ गरिएको सीआईबीले जनाएको छ।
पक्राउ पर्नेहरूमा बैतडी पाटन नगरपालिका–२ स्थायी घर भई हाल काठमाडौं महानगरपालिका–३२ तिनकुने बस्ने ४० वर्षीया रश्मी पन्त, गुल्मी साविक ग्वादी–६ स्थायी घर भई हाल रुपन्देही सिद्धार्थनगर नगरपालिका–८ बस्ने ४४ वर्षीय सन्तोष ज्ञवाली, गुल्मी साविक अमरअर्वाथोक–५ स्थायी घर भई हाल रुपन्देही सिद्धार्थनगर नगरपालिका–७ बस्ने ४१ वर्षीय राजेन्द्र श्रेष्ठ तथा रुपन्देही साविक शंकरनगर–३ स्थायी घर भई हाल तिलोत्तमा नगरपालिका–४ बस्ने ४८ वर्षीय शिशिर पौडेल रहेका छन्।
सीआईबीका अनुसार पक्राउ परेका चारै जनामाथि बैंकिङ कसुर मुद्दामा थप अनुसन्धान भइरहेको छ।
नेपाल प्रहरी प्रधान कार्यालय, केन्द्रीय अनुसन्धान ब्युरो (सीआईबी)का सूचना अधिकारी प्रहरी वरिष्ठ उपरीक्षक अनुपमशेर जबराले उक्त जानकारी दिएका हुन् ।
वि.सं.२०८३ साउन १३ बुधवार २०:५७ मा प्रकाशित
