हामी सबैकाे संसारन्यूज

काठमाडौं । नेपालस्थित अमेरिकी दूतावासले भिसा अन्तर्वार्ताको मिति छिटो मिलाइदिने भन्दै ठगी गर्ने व्यक्तिहरूप्रति सचेत रहन सर्वसाधारणलाई आग्रह गरेको छ।

दूतावासले सार्वजनिक गरेको सूचनामा दूतावासबाहिर कसैले ‘दूतावासमा आफ्नो चिनजान छ; भन्दै भिसा अन्तर्वार्ताको मिति छिटो मिलाइदिने दाबी गरेमा त्यसलाई ठगीको प्रयासका रूपमा लिन आग्रह गरिएको छ।

दूतावासका अनुसार भिसा अन्तर्वार्ताको मिति बुक गर्न वा परिवर्तन गर्न चाहने सेवाग्राहीले अमेरिकी दूतावासको आधिकारिक वेबसाइटबाट मात्र प्रक्रिया पूरा गर्नुपर्छ। कुनै पनि व्यक्ति वा बिचौलियाको प्रलोभनमा नपर्न दूतावासले सचेत गराएको छ।

दूतावासले भिसा सेवासम्बन्धी सबै आधिकारिक जानकारी तथा सेवा केवल आफ्नो आधिकारिक माध्यमबाट मात्र उपलब्ध हुने स्पष्ट गर्दै सेवाग्राहीलाई सुरक्षित र आधिकारिक प्रक्रियामार्फत मात्रै सेवा लिन आग्रह गरेको छ।