हामी सबैकाे संसारन्यूज

डोटी । डोटीको जोरायल गाउँपालिका–४ देउथलीमा मादक पदार्थ सेवन (मापसे) गरेका एक पुरुषले आफ्नी श्रीमतीमाथि कुटपिट गर्दा उनको उपचारका क्रममा मृत्यु भएको छ। घटनामा संलग्न श्रीमानलाई प्रहरीले पक्राउ गरेको छ।

प्रहरीका अनुसार सोही स्थानका अन्दाजी ५०-५१ वर्षीय चन्द्रबहादुर ओलीले मादक पदार्थ सेवन गरी आफ्नी ४७ वर्षीया अमृता ओलीमाथि कुटपिट गरेका थिए।

घटनाको जानकारी वडा अध्यक्षमार्फत प्राप्त भएपछि घटनास्थलमा पुगेको प्रहरी टोलीले कुटपिटमा संलग्न चन्द्रबहादुर ओलीलाई नियन्त्रणमा लिएको जनाएको छ।

कुटपिटबाट गम्भीर घाइते भएकी अमृता ओलीलाई प्रारम्भिक उपचारका लागि स्थानीय चन्कट्टे स्वास्थ्य चौकीमा लगिएको थियो। त्यहाँ सामान्य उपचारपछि थप उपचारका लागि सेती प्रादेशिक अस्पताल, धनगढी रिफर गरिएको थियो।

अस्पतालमा उपचारकै क्रममा चिकित्सकले अमृता ओलीलाई मृत घोषणा गरेका हुन्। प्रहरीले घटनाबारे थप अनुसन्धान भइरहेको जनाएको छ।