हामी सबैकाे संसारन्यूज

काठमाडौं । नेपाली कांग्रेसबाट पोखराको मेयर बन्नका लागि १८ जनाले आकांक्षा देखाएका छन् । गण्डकी प्रदेशका कानुन, सन्चार तथा प्रदेशसभा मामिला मन्त्री विन्दुकुमार थापासहित १८ जनाले आकांक्षा देखाएका हुन् ।

मेयरको उम्मेदवार हुन यसअघि उपमेयरमा पराजित नेतृ सरस्वती गुरुङले निवेदन दिएकी छिन् । थापा र गुरुङसँगै बाबुराम आचार्य, सुदीपमोहन भट्टराई, परमेश्वर पोखरेल, निर्मलप्रसाद कर्मचार्य, कृष्णबहादुर केसी, विश्वशंकर पालिखे, नन्दप्रसाद तिवारी, गंगाधर पराजुली, वीरेन्द्रनारायण बिजुक्छे, किशोरदत्त बराल, बाबुराम गिरी, गणेशबहादुर भट्टराई, कोपीला रानाभाट, विश्व घिमिरे, ऋषि सापकोटा र किरण केसीले नाम टिपाएका हुन् ।

त्यस्तै, उपमेयरमा १० जनाको मनोनयन परेको छ । लक्ष्मी पाण्डे, माया बराल क्षेत्री, रंगीला आचार्य, आनन्दी राणा कार्की, टिका कुमारी गुरुङ, दीपक महत, चिनु गुरुङ, गोविन्द नेपाली, शिव केसी, र मिलन थापाको नाम दर्ता भएको कांग्रेस कास्कीले जनाएको छ ।

कांग्रेसले पोखराको मेयरका लागि २५ हजार र उपमेयरका लागि २० हजार शुल्क तोकेको छ ।

सत्ता गठबन्धनभित्र माधवकुमार नेपाल नेतृत्वको नेकपा (एस)ले पोखराको मेयर पाउनुपर्ने माग गरेको छ । तर, कांग्रेसले पोखरा नछाड्ने बताइरहँदा आकांक्षीको ओइरो देखिएको हो ।