Sansar News
काठमाडौं । आफूमाथि गरिएको कारबाही गैरकानुनी रहेको भन्दै नेपाल राष्ट्र बैंकका गभर्नर महाप्रसाद अधिकारीले दिएको रिट आइतबार दर्ता भएन । सर्वोच्च अदालतले अध्ययन गर्न आवश्यक रहेको भन्दै दर्ता रोक्यो ।
अदालतका प्रवक्ता विमल पौडेलले अध्ययन पछि मात्रै दर्ता गरिने बताएका छन् । उनका अनुसार रिट अध्ययन गर्न आवश्यक देखिएपछि तत्कालै दर्ता गरिएन ।
“उहाँ (महाप्रसाद अधिकारी)ले आज निलम्बनविरुद्ध रिट निवेदन दिनु भएको थियो”, प्रवक्ता पौडेलले भनेका छन्, “अहिले अध्ययन भइरहेको छ । अध्ययनपछि मात्र दर्ता हुनेछ ।”
सरकारले गत चैत २५ गते अधिकारीलाई गभर्नर पदबाट निलम्बन गरेको थियो। आफूलाई निलम्बन गर्ने सरकारको निर्णय असंवैधानिक रहेको जिकिर रिट निवेदनमा गरिएको छ । उनले निलम्बनको निर्णय खारेज गरी आफ्नो पुनर्बहालीको माग रिट निवेदनमार्फत गरेका छन् ।
सम्बन्धित समाचार
वि.सं.२०७९ वैशाख ४ आइतवार १८:०८ मा प्रकाशित
