हामी सबैकाे संसारन्यूज

काठमाडौं । सत्ता गठबन्धनको बैठक जारी रहँदा नेपालका लागि अमेरिकी राजदूत र्‍याण्डी बेरी प्रधानमन्त्री निवास बालुवाटार छिरेका छन् । चुनावी तालमेलको विषयमा टुंगो लगाउन गठबन्धनका नेताहरु जम्मा भएकै बखत उनी बालुवाटार छिरेका हुन् ।

प्रधानमन्त्रीको सचिवालयले जनाएअनुसार प्रधानमन्त्री शेरबहादुर देउवासँगको भेटवार्ताका लागि उनी बालुवाटार पुगेका हुन् । पूर्व निर्धारित भेटघाटअनुसार नै राजदूत बालुवाटार आएको जनाएको छ ।

महानगर, उपमहानगर र स्थानीय तहमा तालमेलको निर्णय गर्न सत्ता गठबन्धनका शीर्ष नेताहरु सोमबार बिहान पनि बैठकमा बसेका थिए । तर, बिहानको बैठकमा सहमति हुन नसकेसँगै नेताहरु दोस्रो चरणमा छलफलमा जुटेका हुन् ।

बिहानको बैठकमा सबै दलहरुले आ आफ्नो दाबी पेस गरेका थिए। माओवादी केन्द्र, एकीकृत समाजवादी र जनता समाजवादी पार्टीले महानगरमा एक/एक सिट पाउनुपर्ने दाबी पेस गरेका थिए। सत्तारुढ दलहरुले आजै महानगर र उपमहानगरको बाँडफाँट टुङ्गाउने तयारी गरेका छन्।