हामी सबैकाे संसारन्यूज

काठमाडौं । नेपाल राष्ट्र बैंकका गभर्नर महाप्रसाद अधिकारी नियमित काममा फर्किएका छन् । सर्वोच्च अदालतले गभर्नरलाई आफ्नो पदीय जिम्मेवारी पुरा गर्न दिन सरकारको नाम अल्पकालीन आदेश जारी गरेपछि उनी आजबाट नियमित काममा फर्किएका हुन् ।

काममा फर्किए पछि पत्रकारहरुसँग कुरा गर्दै गभर्नर अधिकारीले बिना आग्रह, पूर्वाग्रह अर्थमन्त्रालयसँग गर्नु पर्ने सम्पर्क र समन्वयलाई जारी राख्ने बताए । यस विषयमा थप सतर्क हुने उनको भनाई थियो । सर्वोच्च अदालतका न्यायधिश हरिप्रसाद फुयालको एकल इजलाशले मंगलबार उनीमाथि कारवाही अघि नबढाउन आदेश दिएको थियो । त्यस्तै उनीमाथी छानविन गर्नको लागि छानविन समिति गठन गर्नुको कारण माग गर्दै कारण देखाउ आदेश समेत जारी गरेको थियो ।

इजलाशले हाललाई गभर्नरको पक्षमा अल्पकालीन अन्तरिम आदेश गर्दै अन्तरिम आदेश दिने कि नदिने भन्ने विषयमा छलफल गर्न दुवै पक्षलाई बोलाएको थियो । अदालतले उनलाई पदीय जिम्मेवारी गर्न दिनको लागि समेत आदेश दिएकोे थियो । सरकारले छानविन समिति बनाएर आफुलाई निलम्बन गरेपछि गभर्नर अधिकारी अदालत गएका थिए ।