हामी सबैकाे संसारन्यूज

काठमाडौं । सेन्चुरी बैंकको नाफा झण्डै २ सय प्रतिशतले बृद्धि भएको छ । चालु आर्थिक वर्षको तेस्रो त्रैमाससम्म बैंकको खुद नाफा १८३.५९ प्रतिशतले बृद्धि भएको हो । गत आर्थिक वर्षको सोही अवधिमा ३५ करोड ८१ लाख ५० हजार रुपैयाँ खुद नाफा गरेको सेञ्चुरी बैंकले चालु आर्थिक वर्षको तेस्रो त्रैमाससम्म १ अर्ब १ करोड ५६ लाख ८३ हजार रुपैयाँ खुद नाफा गरेको हो ।

यद्यपि, नाफाको हिसाबले ग्लोबल आईएमई बैंकले सबैभन्दा बढी नाफा कमाएको छ । बैंक सोही अवधिमा तीन अर्ब ७२ करोड ८२ लाख रुपैयाँ खुद नाफा आर्जन गरेको छ । यो नाफा गत आवको सोही अवधिको तुलनामा ४.१३ प्रतिशतले बढेको हो । बैंकको खुद ब्याज आम्दानी सात अर्ब ४३ करोड ९७ लाख छ भने वितरण योग्य नाफा एक अर्ब ९१ करोड ९१ लाख रुपैयाँ रहेको छ ।

त्यस्तै, एनएमबी बैंकले २ अर्ब ६६ करोड ५२ लाख रुपैयाँ खुद नाफा गरेको छ । गत आर्थिक वर्षको सोही अवधिको तुलनामा बैंकको नाफा ५.९१ प्रतिशतले बढेको छ । गत आवको चैतमसान्तसम्म बैंकको खुद नाफा २ अर्ब ५१ करोड ६४ लाख रुपैयाँ थियो । एनएमबीको वितरणयोग्य नाफा १ अर्ब ३२ करोड ८९ लाख रुपैयाँ छ ।

तथ्याङ्कअनुसार चालु आर्थिक वर्षको तेस्रो त्रैमाससम्म १५ वाणिज्य बैंकको नाफामा वृद्धि भएको छ भने १२ वटा बैंकको नाफामा ब्रेक लागेको छ । रिपोर्टअनुसार नाफा वृद्धि गर्ने बैंकहरुमा सेन्चुरी बैंक, सिभिल बैंक, नेपाल एसबीआई बैंक, स्ट्यान्डर्ड चार्टर्ड बैंक, एनसीसी बैंक, माछापुच्छ्रे बैंक, एनआईसी एसिया बैंक, सनराइज बैंक, हिमालयन बैंक, एनएमबी बैंक, ग्लोबल आईएमई बैंक, सिटिजन बैंक, मेगा बैंक, सिद्धार्थ बैंक र एभरेष्ट बैंक रहेका छन् ।

तर, अघिल्लो वर्षको तुलनामा नेपाल बैंक, कृषि विकास बैंक, राष्ट्रिय वाणिज्य बैंक, कुमारी बैंक, प्राइम कमर्सियल बैंक, नबिल बैंक, नेपाल इन्भेष्टमेन्ट बैंक, सानिमा बैंक, प्रभु बैंक, बैंक अफ काठमाडौं, नेपाल बंगलादेश बैंक र लक्ष्मी बैंकको नाफामा ब्रेक लागेको छ ।

कुन बैंकको नाफा कति ?