Sansar News
काठमाडौँ । यहि बैशाख ३० गते हुने स्थानीयतहको निर्वाचनका लागि उम्मेदवारी दिएकामध्ये ३५३ जना निर्विरोध निर्वाचित भएका छन् ।
स्थानीय तह निर्वाचनमा मनोनयनपत्र दर्ता गराएकामध्ये विभिन्न पदमा ३५३ निर्विरोध निर्वाचित भएका ह्ुन् । निर्वाचनका लागि आयोगको कार्यतालिकाअनुसार यही वैशाख ११ र १२ गते मनोनयनपत्र दर्ताको समय दिइएकामा जाँचबुझ र फिर्ता लिने समय सकिएपछि यही १७ गते उम्मेदवारको अन्तिम नामावली प्रकाशन गरिएको थियो ।
आयोगको प्रणालीमा प्रविष्ट भएअनुसार विभिन्न पदमा एकल उम्मेदवारी परेका ३५३ निर्विरोध निर्वाचित भएको आयोगका सहायक प्रवक्ता एवं उपसचिव सूर्यप्रसाद अर्यालले जानकारी दिएका छन् ।
त्यसैगरी दलित वडा सदस्य पदमा १७० स्थानमा उम्मेदवारी नै नपरेको अर्यालले जानकारी दिएका छन् ।
आयोगका अनुसार निर्विरोध भएकालाई मतगणना सम्पन्न भएपछि निर्वाचन अधिकृतको कार्यालयले प्रमाणपत्र दिनेछ । निर्वाचनमा ७५३ पालिकामा गरी कूल ३५ हजार २२१ पदका लागि निर्वाचन हुँदैछ ।
निर्वाचनका लागि देशैभरीबाट १ लाख ५३ हजार १४५ जनाले विभिन्न पदमा उम्मेदवारी दिइएकोमा हालसम्म ८ हजार ३३ जनाले उम्मेदवारी फिर्ता लिएका छन ।
वि.सं.२०७९ वैशाख २० मंगलवार ११:३१ मा प्रकाशित
