हामी सबैकाे संसारन्यूज

काठमाडौं । सत्तारुढ गठबन्धनले आज पोखरामा चुनावी सभाको आयोजना गर्दैछ ।

आगामी शुक्रबार हुने स्थानीयतहको निर्वाचनका लागि सत्तारुढ गठबन्धन दलले यसअघि चितवन र जनकपुरमा चुनावी सभा गरेको थियो भने आज बिहान ११ बजे पोखराको अमरसिंह चौरमा सभाको आयोजना गरेको हो ।

उक्त चुनावी सभालाई गठबन्धनका शिर्ष नेतृत्वहरु प्रधानमन्त्री एवम् नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत समाजवादीका अध्यक्ष माधव नेपाल, जनता समाजवादी पार्टीका संघीय परिषद् अध्यक्ष डा. बाबुराम भट्टराई लगायतका स्थानीयतहका नेताहरुले सम्बोधन गर्ने बताइएको छ।

पोखराको सभा सम्पन्नपछि आजै दाङको घोराहीमा गठबन्धनद्धारा आयोजित सभालाई कांग्रेस सभापति देउवा र माओवादी केन्द्रका अध्यक्ष प्रचण्डले सम्बोधन गर्ने बताइएको छ ।

पोखरामा सत्तारुढ गठबन्धनबाट एकिकृत समाजवादी पार्टीका कास्की जिल्ला अध्यक्ष धनराज आचार्य मेयर पदका उम्मेदवार छन् भने एमालेले कृष्ण थापालाई मेयरको उम्मेदवार बनाएको छ ।