हामी सबैकाे संसारन्यूज

काठमाडौं । नेकपा (एमाले) अध्यक्ष केपी शर्मा ओलीले आफ्नो पार्टीले युवालाई स्वदेशमै रोजगारी दिने बताएका छन् । प्रधानमन्त्री शेरबहादुर देउवा पत्नी आरजु देउवाको अभिव्यक्तिप्रति टिप्पणी गर्दै उनले यस्तो बताएका हुन् ।

“कांग्रेसकै एक जना नेताले मलेसिया पठाइदिन्छु भन्नुभएको सुनियो । मेनपावर कम्पनी खोलेको हो र ?”, उनले भने, “हामी मलेसिया पठाउने होइन, देशभित्रै युवालाई तालिम दिन्छौँ, रोजगारी दिन्छौँ । रोजगारी दिने होइन, उनीहरूलाई उद्यमी बनाउँछौँ ।”

अध्यक्ष ओलीले बच्चाले पनि कांग्रेस, गठबन्धन र एमालेबीच भिन्नता छुट्याउन सक्ने बताए । अध्यक्ष ओलीले नेतृ राणाले कांग्रेसले नजितेका पालिकामा बजेट नदिने भनेर दिएको अभिव्यक्तिमाथि पनि प्रश्न गरे ।

उनले अगाडि भने, “एक जना कांग्रेस नेताले जनताले पसिना तिरेर पठाएको पैसा नपठाउने रे ! उनको खल्तीको पैसा हो ? बाउबाट ल्याएका पैसा हो कि दाइजो हो ? त्यस्तो बोल्ने ? ती सपना उडायो हुरीले हुन्छ ।”

केही दिन अघि नेतृ राणाले एक चुनावी कार्यक्रममा बोल्ने क्रममा आफ्नो पार्टीले जितेमा केही युवाहरुलाई मलेसिया पठाउन सहयोग गर्ने बताएकी थिइन् । उनले आफ्नो पार्टीले नजितेका ठाउँमा बजेट नपठाउने पनि बताएकी थिइन् । जुन अभिव्यक्तिमाथि चौतर्फी आलोचना भइरहेको छ ।