Sansar News
काठमाडौं । पूर्वप्रधानमन्त्री तथा जनता समाजवादी पार्टीका संघीय परिषद् अध्यक्ष डा. बाबुराम भट्टराईलाई आफ्नै गृहनगर गोरखाको पालुङटारमा धक्का लागेको छ ।
गोरखाका अधिकांस स्थानीयतहमा विजयी हुँदै आएको नेकपा माओवादी केन्द्रले अन्ततः पालुङटारको प्रमुख र उपप्रमुख दुवै पदमा जित हासिल गरेको छ । यो सँगै माओवादी केन्द्रले गोरखाका ७ स्थानीयतहको प्रमुख पदको नेतृत्वमा जित हासिल गरेको हो ।
बिहीबार बिहान प्राप्त परिणाम अनुसार पालुङटार नगरपालिकाको मेयरमा माओवादी केन्द्रका विवस चिन्तन विजयी भएका छन् । उनले ६०७२ मत ल्याएर मेयरमा निर्वाचित हुँदा उनका निकटतम् प्रतिद्धन्द्धी जनता समाजवादी पार्टीका प्रेम बहादुर गुरुङले ५,७१७ मत प्राप्त गरेका छन् । साथै निर्वतमान मेयर समेत रहेका दीपकबाबु कँडेलले ४९९७ मत ल्याएर तेस्रो भएका छन् भने एमालेका हरि भट्टले ९४१ मत प्राप्त गरेका थिए ।
त्यसैगरी उपमेयरमा माओवादी केन्द्रकी उम्मेदवार बन्दना पाण्डे निर्वाचित भएकी छन् । पाण्डेले ५५७९ मत ल्याएर उपमेयरमा निर्वाचित हुँदा नेपाली कांग्रेसकी चेतकुमारी श्रेष्ठले ५०७७ मत ल्याएकी छन् । साथै जसपा र एमालेकी साझा उम्मेदवार पार्वतीदेवी पाठकले ४२८१ मत प्राप्त गरेकी थिइन् ।
वि.सं.२०७९ जेठ ५ बिहीवार ०९:४१ मा प्रकाशित
