हामी सबैकाे संसारन्यूज

काठमाडौ । अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) ले पेट्रोलियम पदार्थमा भएको मूल्य वृद्दिका विरुद्धमा सडकमा उत्रने चेतावनी दिएको छ ।

नेपाल आयल निगमले पेट्रोलियम पदार्थमा निरन्तर गरिरहेको मुल्यबृद्धिको सन्दर्भमा पछिल्लो मुल्यबृद्धिले किर्तिमान बनाएको भन्दै निगमभित्र भएका भ्रष्टाचार, चुहावट, अनियमितता अन्त्य गर्न तथा सहुलियत दरमा पेट्रोलियम पदार्थ उपलब्ध गराउन अन्य बैकल्पिक उपायहरुको खोजी गर्नुपर्ने माग गरेको छ ।

संगठनले मंगलबार एक विज्ञप्ति दजारी गर्दै भनेको छ– ‘हाम्रो मागलाई बेवास्ता गरिए कठोर सडक संघर्षमा उत्रने चेतावनी दिन चाहन्छौं ।’

संगठनले नागरिकको कष्टसाध्य जीवनप्रति पूर्णतः बेखवर रहि गरिएको मूल्यबृद्धिले जनजीवनमा निकै भयावह अवस्था सृजना गरेको र वर्तमान परिस्थितिले सबैलाई गम्भीर बनाएको बताएको छ ।

‘बहुसंख्यक नागरिकको आय अति कम भएको हाम्रो जस्तो मुलुकमा सरकार नियन्त्रित आयल निगमले अन्तराष्ट्रिय मुल्यबृद्धिको हवाला दिएर बेलगाम रुपमा मुल्यबृद्धि गर्ने हो भने सरकार के का लागी हो ? राज्य आफ्ना नागरिक प्रतिको भुमिका र दायित्वबाट पन्छँदै किन भागिरहेको छ ? हामी प्रश्न गर्न चाहन्छौं ।’ विज्ञप्तिमा भनिएको छ ।

घाटामा गएको भनिएको आयल निगमको नेतृत्व मालदार अड्डा मानिने, निगम भित्र नियुक्ति र रोजगारी सँधै आकर्षक हुने पेट्रोल पम्पहरु निरन्तर नाफाको व्यवसाय बनिरहने र कर्मचारीहरु बोनस खाने तर निगम संधै घाटामा हुने कसरि ? भन्ने प्रश्न समेत गरिएको छ ।

‘पेट्रोलियम खरिद बिक्री सहितको सबै हिसाब आम नागरिकले बुझ्ने गरि सार्वजनिक गर्न र हालको संकटको अबधिभर पेट्रोलियम आयातलाई शतप्रतिशत भन्सार छुट गरेर पनि सहुलियत दरमा इन्धन उपलब्ध गराउन अखिल (क्रान्तिकारी ) जोडदार माग गर्दछ ।’ बिज्ञप्तिमा भनिएको छ ।