हामी सबैकाे संसारन्यूज

काठमाडौं । रुसले गत २४ फेब्रुअरीमा युक्रेनमाथि युद्धको घोषणा गरेपछि नेटोले चौतर्फी घेराबन्दी गरेको छ । नेटोले रुसलाई एक्ल्याउने र कमजोर बनाउने योजनामा निरन्तर सक्रिय छ ।

रुसपछि नेटोले आफ्नो ध्यान चीनमा केन्द्रित गरेको छ । गत हप्ता म्याड्रिडमा भएको नेटो बैठकमा जापान, दक्षिण कोरिया, अष्ट्रेलिया र न्युजिल्यान्डले पनि सहभागिता जनाएका थिए । एशिया प्रशान्त क्षेत्रका यी चार देशसँग सहयोग बढाएर चीनलाई घेरा हाल्ने प्रयासमा नेटो अघि आएको छ ।

नेटोले यी चार सहयोगीहरूसँग साइबर सुरक्षा र सामुद्रिक सुरक्षामा सहयोगसम्बन्धी सम्झौताहरू पनि हस्ताक्षर गरेको छ। यी चार देशका नेता नेटो बैठक र सम्झौतामा जानुको कारण रुसले युक्रेनमाथि गरेको आक्रमण र चीनको बढ्दो आक्रामकता रहेको विज्ञहरुको अनुमान छ ।

बैठकमा जापानी प्रधानमन्त्री फुमियो किशिदाले आफ्नो उपस्थितिले युरोप र इन्डो(प्यासिफिकको सुरक्षा ‘अभिन्न’ हो भन्ने कुरा नेताहरूले बुझेको बताएका थिए। उनले पूर्वी एसिया युक्रेनमा परिणत हुँदै गएकोमा गहिरो अनुभूति भएको बताएका थिए ।

स्वीडेन र फिनल्याण्ड पनि नेटोमा

उत्तर एट्लान्टिक सन्धि संगठन (नेटो) का तीस सहयोगीहरूले स्वीडेन र फिनल्याण्डको लागि एक्सेशन प्रोटोकलमा हस्ताक्षर गरेका छन्।

फिनल्याण्डका विदेशमन्त्री पेक्का हाभिस्टो र स्वीडेनका विदेशमन्त्री एन लिन्डेको उपस्थितिमा नेटो मुख्यालयमा मंगलबार नाटोका राजदूतहरूले फिनल्याण्ड र स्वीडेनका लागि उक्त प्रोटोकलमा हस्ताक्षर गरेका हुन् । पछिल्लो हस्ताक्षरसँगै अब स्वीडेन र फिनल्याण्ड पनि नेटोमा सहभागि हुनेछन् ।

गत हप्ता म्याड्रिड शिखर सम्मेलनमा, नेटो सहयोगी नेताहरूले टर्की, फिनल्याण्ड र स्वीडेन बीचको त्रिपक्षीय समझदारी पछि फिनल्याण्ड र स्वीडेनलाई संगठनमा सामेल हुन आमन्त्रित गर्न सहमत भए। एजेन्सीबाट