हामी सबैकाे संसारन्यूज

काठमाडौं । राष्ट्रिय प्रजातन्त्र पार्टी (राप्रपा) ले उपत्यका केन्द्रीत जनसंघर्षका कार्यक्रम संचालन गर्ने भएको छ ।

उक्त पार्टीको साउन ५, ६ र ७ गतेसम्म बसेको पार्टीको केन्द्रीय कार्यसमितिको बैठकले जनजीवीकाको सवाल, राष्ट्रियता, प्रजातन्त्रको रक्षा, भ्रष्टाचारको अन्त्य, संबैधानिक राजसंस्था र वैदिक सनातन धर्मसापेक्ष हिन्दुराष्ट्र पुर्नस्थापना लगायतका विषयमा जारी आन्दोलनलाई साउनभरी निरन्तर जारी राख्ने तथा भदौमा उपत्यका केन्द्रीत जनसंघर्षका कार्यक्रम गर्ने निर्णय गरेको छ ।

‘गत आवधिक निर्वाचनहरूमा सरकार निष्पक्ष नरहेको तीतो अनुभवलाई मध्यनजर गर्दै, आगामी प्रदेश तथा प्रतिनिधि सभाको निर्वाचन स्वतन्त्र, निष्पक्ष, धाँधलीरहित र विश्वसनीय रूपमा सम्पन्न गर्नका लागि निष्पक्ष चुनावी सरकार गठन गर्न राप्रपा माग गर्दछ ।’ बैठकको निर्णयको बुँदा नं २ मा भनिएको छ ।

त्यसैगरी अत्यधिक महँगीका कारण आम सर्वसाधारण प्रताडित भएको र जनताको दैनिकी तथा अर्थ व्यवस्थामा नकारात्मक असर परेको हुनाले पेट्रोलियम पदार्थ, खाना पकाउने ग्यास, दैनिक सेवा, सुविधा र उपभोग्य वस्तुको मूल्य वृद्दि नियन्त्रण र प्रभावकारी अनुगमन गर्न र अति गरिब एवं असहायलाई राहत उपलब्ध गराउन समेत सरकारको ध्यानाकर्षण गराएको छ ।